पुन्हा ‘२ ऑक्टोबर’चा खेळ

ajay-devgn अजय देवगण पुन्हा एकदा विजय साळगावकरच्या भूमिकेत प्रेक्षकांसमोर येत असून ‘दृश्यम ३’मधून या लोकप्रिय कथानकाचा अंतिम अध्याय मांडण्याचा प्रयत्न करण्यात आला आहे. कुटुंब, पोलिसांचा तपास, जुने पुरावे आणि विजयचे प्रसंगावधान या परिचित घटकांसोबत यावेळी एका नव्या अधिकाऱ्याची या प्रकरणात एंट्री होते. त्यामुळे विजयसमोरचे आव्हान यावेळी अधिक गुंतागुंतीचे बनते.

 

 

गोव्यातील आयुष्य पुन्हा सुरळीत करण्याचा प्रयत्न विजय साळगावकर आणि त्याचे कुटुंब करत असतानाच जुने प्रकरण पुन्हा उघडले जाते. तब्बूने साकारलेली मीरा देशमुख या काळात मुलाच्या मृत्यूच्या दुःखातून अजूनही सावरलेली नसते. तिच्या आयुष्यातील या घटनेचा परिणाम तिच्या व्यक्तिमत्त्वावर झालेला दिसतो. याच वेळी जयदीप अहलावतने साकारलेला राजीव सिंग तोमर गुन्हे शाखेचा नवा प्रमुख म्हणून कथेत दाखल होतो. विजयला सत्यापर्यंत पोहोचण्यापासून रोखण्यासाठी नव्हे, तर त्याच्याविरोधात दडलेले पुरावे शोधून काढण्यासाठी तो जुन्या प्रकरणाची पुन्हा चौकशी सुरू करतो. डीएनए पुराव्यापासून जुन्या कबरीपर्यंत तपासाची व्याप्ती वाढवली जाते आणि त्यामुळे विजयसमोर मोठे संकट उभे राहते.

 

चित्रपटाची कथा प्रेक्षकांच्या मनात निर्माण होणाऱ्या प्रश्नांशीही जोडली जाते. जुने प्रकरण किती वेळा उघडणार, विजय पुन्हा पोलिसांना कसा चकवणार आणि अखेरीस सत्य समोर येणार का, अशा प्रश्नांची उत्सुकता चित्रपटात कायम ठेवण्याचा प्रयत्न केला आहे. मागील भागांतील घटनांची आठवण करून देतानाच गायतोंडेच्या व्यक्तिरेखेतून विनोदाची फोडणी दिली जाते. केस बंद होणे आणि पुन्हा उघडणे, विजयचे प्रत्येक वेळी पोलिसांपेक्षा काही पावले पुढे राहणे यामुळे कथेला जुन्या ‘दृश्यम’ची छटा मिळते.

 

विजय साळगावकरच्या भूमिकेत अजय देवगणचा अभिनय हा चित्रपटातील महत्त्वाचा भाग ठरतो. संवादांपेक्षा त्याच्या चेहऱ्यावरील भाव, शांतपणा आणि प्रसंग ओळखण्याची त्याची क्षमता विजयचे पात्र प्रभावी बनवते. संकटाची चाहूल लागण्यापूर्वीच त्याचा अंदाज घेण्याची विजयची सवय पुन्हा पाहायला मिळते. त्यामुळे पोलिसांच्या प्रत्येक हालचालीला तो कसा उत्तर देतो, याची उत्सुकता कायम राहते.

 

जयदीप अहलावतने साकारलेला राजीव सिंग तोमर सुरुवातीला विजयसमोरचा प्रभावी प्रतिस्पर्धी म्हणून उभा राहतो. मात्र, कथानक पुढे जात असताना त्याच्या व्यक्तिरेखेचा प्रभाव अपेक्षेइतका टिकून राहत नाही. सुरुवातीला निर्माण केलेली उत्सुकता आणि पुढील घटनांमधील त्याची भूमिका यामध्ये काहीशी तफावत जाणवते. तरीही अहलावतने मिळालेल्या भूमिकेला योग्य न्याय देण्याचा प्रयत्न केला आहे.

 

तब्बूची मीरा देशमुख ही व्यक्तिरेखा यावेळी तपासापेक्षा दुःख आणि मुलाच्या गमावल्याच्या वेदनेभोवती अधिक फिरताना दिसते. तिची भूमिका तुलनेने मर्यादित असली तरी पडद्यावर येताना ती लक्ष वेधून घेते. रजत कपूरने महेश देशमुखची भूमिका साकारली असून यावेळी त्याला अधिक संवाद आणि कथेत पुढाकार घेण्याची संधी मिळते. श्रिया सरनने नंदिनी साळगावकरच्या भूमिकेत कुटुंबाला एकत्र ठेवण्यासाठी सुरू असलेला संघर्ष भावनिक पद्धतीने मांडला आहे. इशिता दत्ताने अंजूच्या भूमिकेत भूतकाळातील घटनांच्या मानसिक परिणामांना अभिनयातून प्रभावीपणे साकारले आहे.

 

इन्स्पेक्टर लक्ष्मीकांत गायतोंडेच्या भूमिकेत कमलेश सावंत पुन्हा लक्ष वेधून घेतात. विजय आणि गायतोंडे यांच्यातील संवाद आणि जुगलबंदी चित्रपटातील विनोदी क्षण निर्माण करते. प्रकाश राज यांनी बचाव पक्षाच्या वकिलाची भूमिका साकारली असून त्यांच्या अभिनयातून गंभीर प्रसंगांमध्येही सहजता आणि वेगळा रंग दिसतो.

 

अभिषेक पाठक यांनी ‘दृश्यम २’ आणि ‘दृश्यम ३’चे सहलेखन आणि दिग्दर्शन केले आहे. ‘दृश्यम’च्या जगाशी परिचित असलेल्या पाठक यांनी कथेला अंतिम अध्याय देण्याचा प्रयत्न केला आहे. चित्रपटाच्या छायाचित्रणावर आणि कथानकाच्या गतीवर त्यांचे नियंत्रण जाणवते. मात्र, काही ठिकाणी लेखन आणि संपादनामुळे कथानकाची परिणामकारकता कमी झाल्याचे जाणवते. विशेषतः जयदीप अहलावतच्या व्यक्तिरेखेभोवती उभ्या केलेल्या अपेक्षांना शेवटपर्यंत अपेक्षित विस्तार मिळत नाही.

 

चित्रपटात ‘ऑक्टोबर २’, ‘सत्संग’ आणि ‘पाव भाजी’ यांसारख्या आधीच्या भागांशी जोडलेल्या आठवणींचा वापर करण्यात आला आहे. त्यामुळे जुन्या चित्रपटांची आठवण प्रेक्षकांसमोर पुन्हा उभी राहते. विजय आणि त्याच्या कुटुंबाचा एकत्र राहण्यासाठी सुरू असलेला संघर्ष हा या भागातही कथानकाचा केंद्रबिंदू राहतो.

 

‘दृश्यम ३’ची सर्वात मोठी ताकद विजय साळगावकरची व्यक्तिरेखा आणि अजय देवगणचा अभिनय ठरतो. विजय पुन्हा एकदा पोलिसांना आपल्या बुद्धीने मात देताना दिसतो आणि त्यातून निर्माण होणारा ताण चित्रपटाला पुढे नेतो. मात्र, जयदीप अहलावतच्या व्यक्तिरेखेला सुरुवातीला दाखवण्यात आलेली क्षमता पूर्णपणे वापरली गेली नसल्याची खंत राहते. काही प्रसंग ताणलेले वाटतात आणि अंतिम टप्प्यात निर्माण केलेल्या अपेक्षांना चित्रपट पूर्णपणे गाठत नाही. तरीही विजय साळगावकरचा प्रवास या भागातून एका टप्प्यावर येऊन पोहोचतो आणि ‘दृश्यम’च्या कथेला समारोप देण्याचा प्रयत्न केला जातो.