सुवर्णपदकासह भारताची ऑलिम्पिकमध्ये धडक!

olympics-with-a-gold-medal भारताच्या महिला हॉकी संघाने २०२६ आशियाई क्रीडा स्पर्धेच्या अंतिम सामन्यात चीनचा १-० असा पराभव करत सुवर्णपदकावर नाव कोरले. या विजयासह भारतीय महिला हॉकी संघाने तब्बल ४४ वर्षांची प्रतीक्षा संपवली. या ऐतिहासिक कामगिरीसोबतच भारताने २०२८ मध्ये लॉस एंजेलिस येथे होणाऱ्या ऑलिम्पिक स्पर्धेचे तिकीटही निश्चित केले. सामन्यात भारताकडून झालेला एकमेव गोल १०व्या मिनिटाला झाला आणि त्यानंतर अखेरपर्यंत चीनला बरोबरी साधता आली नाही.

सामन्याच्या सुरुवातीपासून भारतीय खेळाडूंनी आक्रमक खेळ करत चीनवर दबाव निर्माण केला. सहाव्या मिनिटाला बलजीत कौरला हिरवे कार्ड मिळाले असले तरी भारतीय संघाच्या खेळावर त्याचा फारसा परिणाम झाला नाही. दहाव्या मिनिटाला लालरेम्सियामीने शानदार मैदानी गोल करत भारताला १-० अशी आघाडी मिळवून दिली. विशेष म्हणजे हा तिचा २००वा आंतरराष्ट्रीय सामना होता. त्यानंतर भारताला पेनल्टी कॉर्नरवर आघाडी वाढवण्याची संधी मिळाली, मात्र त्याचे गोलमध्ये रूपांतर करता आले नाही. पहिला क्वार्टर भारताच्या १-० आघाडीसह संपला.

दुसऱ्या क्वार्टरमध्ये चीनने आक्रमणाची धार वाढवत भारतीय संघावर दबाव आणला. बरोबरी साधण्याची चीनला मोठी संधी पेनल्टी स्ट्रोकच्या रूपाने मिळाली; मात्र अनुभवी गोलरक्षक सविता पुनियाने शानदार बचाव करत भारताची आघाडी कायम ठेवली. चीनकडून सातत्याने होणारे हल्ले भारतीय बचावफळीने यशस्वीपणे रोखले. २८व्या मिनिटाला चीनच्या वेन डॅनला फाऊल केल्याबद्दल हिरवे कार्ड दाखवण्यात आले. मध्यंतरापर्यंत भारताने १-० अशी आघाडी कायम राखली. तिसऱ्या क्वार्टरमध्येही चीनने आक्रमण सुरू ठेवत दोन पेनल्टी कॉर्नर मिळवले. मात्र कर्णधार सलीमा टेटेसह भारतीय बचावपटूंनी भक्कम बचाव करत चीनला गोलपासून दूर ठेवले. त्यानंतर भारतीय खेळाडूंनी चेंडूवर नियंत्रण ठेवत सामन्याची गती आपल्या बाजूने राखली. तिसरा क्वार्टरही भारताच्या १-० आघाडीसह संपला.

अखेरच्या क्वार्टरमध्ये चीनने सामना बरोबरीत आणण्यासाठी जोरदार प्रयत्न केले. मात्र भारतीय बचावफळीने संयमाने खेळ करत प्रत्येक हल्ला परतवून लावला. ५२व्या मिनिटाला ऋतुजा पिसाळने चेंडूवर ताबा मिळवत चीनचा आणखी एक हल्ला रोखला. अखेर भारताने १-० अशी आघाडी कायम ठेवत सुवर्णपदकावर कब्जा केला. महिला हॉकीतील भारताचे हे दुसरे सुवर्णपदक असून या विजयामुळे ४४ वर्षांचा प्रतीक्षेचा कालावधी संपला. २०२६ आशियाई क्रीडा स्पर्धेत भारताने आतापर्यंत १६ सुवर्णपदके जिंकली आहेत.