ठाकरेंचा शिवाजी पार्कवर, शिंदेंचा नेस्कोमध्ये दसरा मेळावा
Total Views |
तभा वृत्तसेवा
मुंबईdussehra rally शिवसेनेच्या दसरा मेळाव्याची परंपरा कायम राखत यंदा उद्धव ठाकरे आणि उपमुख्यमंत्री एकनाथ शिंदे यांच्या नेतृत्वाखालील शिवसेनेचे स्वतंत्र मेळावे मुंबईत आयोजित करण्यात आले आहेत. उद्धव ठाकरे यांचा मेळावा दादर येथील शिवाजी पार्कवर, तर एकनाथ शिंदे यांच्या नेतृत्वाखालील शिवसेनेचा मेळावा गोरेगाव येथील नेस्को सेंटरमध्ये होणार आहे. दोन्ही गटांनी या मेळाव्यांच्या माध्यमातून आपापली संघटनात्मक ताकद दाखवण्याची तयारी केली असून, नेत्यांच्या भाषणांतून राज्याच्या राजकारणातील आगामी संघर्षाचे संकेत मिळण्याची शक्यता आहे.
शिवसेनेच्या राजकीय वाटचालीत दसरा मेळाव्याला अनन्यसाधारण महत्त्व आहे. शिवसेनाप्रमुख बाळासाहेब ठाकरे यांनी शिवाजी पार्कवरील दसरा मेळाव्यांतून शिवसैनिकांना मार्गदर्शन करत पक्षाची राजकीय भूमिका मांडली. त्यामुळे या मेळाव्याला शिवसेनेच्या परंपरेचे प्रतीक मानले जाते. मात्र, पक्षातील फुटीनंतर या परंपरेवर दोन्ही गटांनी आपला दावा कायम ठेवला आहे. परिणामी, दोन्ही गटांचे स्वतंत्र दसरा मेळावे हे केवळ राजकीय भाषणांपुरते मर्यादित न राहता शक्तिप्रदर्शनाचे व्यासपीठ बनले आहेत.यंदाच्या मेळाव्यांमध्ये राज्यातील राजकीय परिस्थिती, मराठी अस्मितेचा मुद्दा, आगामी निवडणुकांची रणनीती, सरकारची कामगिरी आणि विरोधकांच्या भूमिकेवरून आरोप-प्रत्यारोप होण्याची शक्यता आहे. त्यामुळे दोन्ही मेळाव्यांना शिवसैनिकांसह राजकीय निरीक्षकांचेही लक्ष लागले आहे.
एकनाथ शिंदे यांच्या नेतृत्वाखालील शिवसेनेचा मेळावा सायंकाळी पाच वाजता गोरेगाव येथील नेस्को सेंटरमध्ये होणार आहे. या मेळाव्यात शिंदे शिवसैनिकांना संबोधित करताना राज्य सरकारच्या विकासकामांचा आणि विविध कल्याणकारी योजनांचा आढावा मांडण्याची शक्यता आहे. सरकारच्या माध्यमातून राबविण्यात आलेले उपक्रम, सर्वसामान्य नागरिकांसाठीच्या योजना आणि पक्षाच्या संघटनात्मक कामाचा लेखाजोखा त्यांच्या भाषणाचा केंद्रबिंदू ठरू शकतो. दुष्काळग्रस्त शेतकऱ्यांना मदत, ग्रामीण भागातील प्रश्न आणि आनंदाच्या शिधावाटपाच्या उपक्रमाच्या पार्श्वभूमीवरही काही घोषणा होण्याची शक्यता व्यक्त केली जात आहे. त्याचबरोबर शिवसेनेची आगामी राजकीय वाटचाल, संघटनात्मक विस्तार आणि विरोधकांच्या आरोपांना उत्तर देताना शिंदे कोणती भूमिका मांडतात, याकडेही लक्ष असेल.शिवाजी पार्क आणि नेस्को सेंटर येथे होणाऱ्या दोन्ही मेळाव्यांच्या माध्यमातून ठाकरे आणि शिंदे गट आपापल्या समर्थकांना एकत्र आणण्याचा प्रयत्न करणार आहेत. दोन्ही बाजूंची उपस्थिती, संघटनात्मक नियोजन आणि प्रमुख नेत्यांच्या भाषणांतून मांडले जाणारे मुद्दे यांना विशेष महत्त्व प्राप्त झाले आहे. शिवसेनेच्या परंपरेवरील दावा, पक्षाची राजकीय ओळख आणि राज्यातील बदलती राजकीय समीकरणे या पार्श्वभूमीवर यंदाचे दसरा मेळावे महत्त्वाचे ठरणार आहेत. दोन्ही नेत्यांच्या भाषणांतून कोणते राजकीय मुद्दे पुढे येतात आणि आगामी राजकीय संघर्षाची दिशा कशी निश्चित होते, याबाबत उत्सुकता निर्माण झाली आहे.