पदवीधर, शिक्षक मतदारसंघांतील प्रचारतोफा थंडावल्या

Maharashtra MLC Elections महाराष्ट्र विधान परिषदेच्या तीन पदवीधर आणि दोन शिक्षक मतदारसंघांतील द्विवार्षिक निवडणुकीच्या प्रचाराची मुदत बुधवारी संपली आहे. छत्रपती संभाजीनगर, पुणे आणि नागपूर विभागांतील पदवीधर, तसेच अमरावती आणि पुणे विभागांतील शिक्षक मतदारसंघांसाठी शुक्रवारी, २३ ऑक्टोबरला मतदान होणार आहे. पाच जागांसाठी एकूण १८२ उमेदवार रिंगणात असून, १० लाख ६८ हजार ७२ मतदार मतदानाचा हक्क बजावणार आहेत. मतदानासाठी २ हजार ४१९ केंद्रांची व्यवस्था करण्यात आली आहे. मंगळवारी, २७ ऑक्टोबरला मतमोजणी होणार असून, ३१ ऑक्टोबरपर्यंत संपूर्ण निवडणूक प्रक्रिया पूर्ण केली जाणार आहे.

 

 

या पाचही मतदारसंघांतील विद्यमान सदस्यांची मुदत ६ डिसेंबर २०२६ रोजी संपत असल्याने केंद्रीय निवडणूक आयोगाने जाहीर केलेल्या कार्यक्रमानुसार निवडणूक होत आहे. मतदानाची प्रक्रिया सकाळी ८ ते सायंकाळी ४ या वेळेत पार पडणार आहे. निवडणूक निष्पक्ष, पारदर्शक आणि निर्भय वातावरणात पार पाडण्यासाठी निवडणूक यंत्रणा सज्ज झाली आहे. पाच जागांसाठी एकूण १८२ उमेदवार निवडणूक लढवत आहेत. छत्रपती संभाजीनगर विभाग पदवीधर मतदारसंघात ४१, पुणे विभाग पदवीधर मतदारसंघात ४७ आणि नागपूर विभाग पदवीधर मतदारसंघात ३८ उमेदवार रिंगणात आहेत. अमरावती विभाग शिक्षक मतदारसंघात २६, तर पुणे विभाग शिक्षक मतदारसंघात ३० उमेदवार निवडणूक लढवत आहेत. पाचही मतदारसंघांमध्ये पुणे विभाग पदवीधर मतदारसंघात सर्वाधिक ४७ उमेदवार असल्याने या मतदारसंघातील लढतीकडे लक्ष लागले आहे.

पाचही मतदारसंघांत मिळून १० लाख ६८ हजार ७२ मतदारांची नोंदणी झाली आहे. पुणे विभाग पदवीधर मतदारसंघात सर्वाधिक ३ लाख ८८ हजार १९ मतदार आहेत. याउलट, अमरावती विभाग शिक्षक मतदारसंघात सर्वात कमी ३५ हजार ८१० मतदार आहेत. मतदानासाठी छत्रपती संभाजीनगर विभाग पदवीधर मतदारसंघात ८४२, पुणे विभाग पदवीधर मतदारसंघात ७४१ आणि नागपूर विभाग पदवीधर मतदारसंघात ४४५ मतदान केंद्रे उभारण्यात आली आहेत. अमरावती विभाग शिक्षक मतदारसंघात ८१, तर पुणे विभाग शिक्षक मतदारसंघात ३१० मतदान केंद्रांची व्यवस्था करण्यात आली आहे. या सर्व केंद्रांवर मतदान सुरळीत पार पाडण्यासाठी आवश्यक नियोजन करण्यात आले आहे.

या निवडणुकीत छत्रपती संभाजीनगर विभाग पदवीधर मतदारसंघाचे सतीश भानुदासराव चव्हाण, पुणे विभाग पदवीधर मतदारसंघाचे अरुण गणपती लाड, नागपूर विभाग पदवीधर मतदारसंघाचे अभिजीत गोविंदराव वंजारी, अमरावती विभाग शिक्षक मतदारसंघाचे किरण रामराव सरनाईक आणि पुणे विभाग शिक्षक मतदारसंघाचे जयंत दिनकर आसगावकर या विद्यमान सदस्यांचा कार्यकाळ ६ डिसेंबर २०२६ रोजी संपणार आहे. त्यामुळे या पाच जागांसाठी नव्याने निवडणूक होत असून, २३ ऑक्टोबरच्या मतदानानंतर २७ ऑक्टोबरला मतमोजणी होऊन निकाल स्पष्ट होणार आहे.