बुलढाण्यातील ४२ हजार शेतकऱ्यांची कर्जमुक्ती यादी जाहीर!

buldhana-farmer-loan-waiver-list-2026महाराष्ट्र शासनाच्या पुण्यश्लोक अहिल्यादेवी होळकर शेतकरी कर्जमुक्ती योजना २०२६ अंतर्गत बुलढाणा जिल्ह्यातील ४२ हजार १४४ पात्र लाभार्थी शेतकर्‍यांची चौथी यादी १३ ऑटोबर २०२६ रोजी प्रसिद्ध करण्यात आली आहे. या योजनेचा लाभ मिळविण्यासाठी पात्र शेतकर्‍यांनी आधार प्रमाणीकरणाची प्रक्रिया पूर्ण करावी तसेच फार्मर आयडीसह आवश्यक कागदपत्रे तयार ठेवावीत, असे आवाहन जिल्हास्तरीय कर्जमुक्ती समितीचे अध्यक्ष तथा जिल्हाधिकारी डॉ. प्रविणकुमार देवरे यांनी केले आहे.

 

 

 

प्रसिद्ध करण्यात आलेल्या लाभार्थी याद्या संबंधित गावातील ग्रामपंचायत कार्यालय, ग्रामसेवा सहकारी संस्थेचे कार्यालय, तलाठी कार्यालय, बँक शाखा आणि सहाय्यक निबंधक कार्यालयांच्या सूचना फलकांवर लावण्यात आल्या आहेत. पात्र शेतकर्‍यांनी या याद्यांचे अवलोकन करून आपले नाव तपासावे. त्यानंतर फार्मर आयडी आणि आधारकार्ड सोबत घेऊन जवळच्या ई-सेवा केंद्रात आधार प्रमाणीकरणाची प्रक्रिया पूर्ण करावी. ज्या शेतकर्‍यांचे आधारकार्ड बँक खात्याशी संलग्न नाही, त्यांनी संबंधित बँक किंवा संस्थेशी तातडीने संपर्क साधून आधार क्रमांक बँक खात्याशी जोडून घ्यावा. आधार प्रमाणीकरणाची प्रक्रिया पूर्ण केल्याशिवाय पात्र शेतकर्‍यांना कर्जमुक्ती योजनेचा लाभ मिळणार नाही, याची नोंद घ्यावी.

 

 

योजनेच्या अंमलबजावणीदरम्यान काही अडचणी किंवा तक्रारी उद्भवल्यास संबंधित शेतकर्‍यांना तालुकास्तरीय अथवा जिल्हास्तरीय तक्रार निवारण समितीकडे दाद मागता येणार आहे. शासनाने निश्चित केलेल्या मुदतीत आवश्यक प्रक्रिया पूर्ण केल्यानंतरच शेतकर्‍यांना योजनेचा लाभ मिळणार आहे. जिल्ह्यातील सर्व पात्र शेतकरी बांधवांनी विलंब न करता लाभार्थी यादी तपासून फार्मर आयडी, आधार प्रमाणीकरण आणि बँक खाते संलग्नतेसंबंधीची आवश्यक कार्यवाही पूर्ण करावी व शासनाच्या कर्जमुक्ती योजनेचा लाभ घ्यावा, असे आवाहन जिल्हाधिकारी डॉ. प्रविणकुमार देवरे यांनी केले आहे.