राजस्थानमध्ये अपघात: कार-ट्रॉलीच्या धडकेत सहा जणांचा मृत्यू

accident-in-rajasthan-six-people-killed राजस्थानमधील चुरू जिल्ह्यात कार आणि ट्रॉली यांच्यात झालेल्या भीषण धडकेत एकाच कुटुंबातील सहा जणांचा मृत्यू झाला. शनिवारी सादुलपूर परिसरातील तारानगर मार्गावर न्यागली गावाजवळ हा अपघात घडला. या दुर्घटनेत पाच जणांचा घटनास्थळीच मृत्यू झाला, तर गंभीर जखमी झालेल्या एका लहान मुलाने उपचारादरम्यान अखेरचा श्वास घेतला. मिळालेल्या माहितीनुसार, सोमसीझर गावातील एकाच कुटुंबातील सदस्य तीर्थयात्रेसाठी गुरुग्रामच्या दिशेने कारने प्रवास करत होते. यावेळी न्यागली गावाजवळ कारची ट्रॉलीशी जोरदार धडक झाली. धडकेची तीव्रता इतकी मोठी होती की कारचे मोठ्या प्रमाणात नुकसान झाले. या अपघातामुळे परिसरात एकच खळबळ उडाली.

 

 

घटनेची माहिती मिळताच अतिरिक्त पोलीस अधीक्षक ऋचपाल सिंग आणि ठाणेदार राजेश कुमार सिहाग पोलीस पथकासह घटनास्थळी पोहोचले. पोलिसांनी परिस्थितीची पाहणी करून मृतांचे मृतदेह शासकीय उपजिल्हा रुग्णालयाच्या शवागारात पाठवले. अपघातात जखमी झालेल्या एका मुलाला उपचारासाठी चुरू येथे हलवण्यात आल्याची माहितीही समोर आली आहे. दरम्यान, अपघातानंतर ट्रॉली चालक घटनास्थळावरून पळून गेल्याची प्राथमिक माहिती आहे. पोलीस त्याचा शोध घेत असून, दुर्घटनेचे नेमके कारण शोधण्यासाठी तपास सुरू आहे.