सरकारविरोधी पोस्टर्सने दिल्ली मेट्रो चर्चेत

delhi-metro दिल्ली मेट्रोच्या एअरपोर्ट एक्सप्रेस मार्गावरील रेल्वेगाडीत सरकारच्या कामगिरीवर प्रश्न उपस्थित करणारे दोन पोस्टर्स आढळल्याने सुरक्षा यंत्रणा सतर्क झाली आहे. या प्रकरणी दिल्ली पोलिसांनी अज्ञात व्यक्तींविरोधात गुन्हा दाखल केला असून, विशेष पथकाच्या माध्यमातून तपास सुरू करण्यात आला आहे. पोस्टर्स लावण्यामागील उद्देश आणि त्यासाठी जबाबदार असलेल्या व्यक्तींचा शोध पोलीस घेत आहेत.

 

 

मेट्रोच्या गाडीत हे पोस्टर्स आढळल्यानंतर संबंधित यंत्रणांनी तातडीने कारवाई केली. ट्रेन ऑपरेटर तरुण चौधरी यांनी पोस्टर्स पाहिल्यानंतर वरिष्ठ अधिकारी आणि ऑपरेशन्स कंट्रोल सेंटरला (ओसीसी) याची माहिती दिली. त्यानंतर दोन्ही पोस्टर्स द्वारका सेक्टर २१ मेट्रो स्थानकाच्या नियंत्रकाकडे सुपूर्द करण्यात आले. पुढे पोलिसांनी ते जप्त करून तक्रारीच्या आधारे कायदेशीर कारवाई सुरू केली.

 

या प्रकरणी दिल्ली सार्वजनिक मालमत्ता विद्रूपीकरण प्रतिबंधक कायदा, २००७ आणि मेट्रो रेल्वे (संचालन व देखभाल) कायदा, २००२ अंतर्गत गुन्हा नोंदवण्यात आला आहे. पोस्टर्सपैकी एका पोस्टरवर क्यूआर कोड होता. हा कोड स्कॅन केल्यानंतर व्हॉट्सॲप समुदायात सहभागी होता येत होते. दुसऱ्या पोस्टरमध्ये देशातील मागील १२ वर्षांतील बदलांबाबत नऊ दावे करण्यात आले होते. महिलांवरील गुन्हे, जमावाकडून होणारी हिंसा, पोलीस कोठडीतील मृत्यू, सरकारी प्रसिद्धीवरील खर्च, रुपयाचे अवमूल्यन आणि रोजगार यांसारख्या मुद्द्यांचा त्यात समावेश होता. या माध्यमातून सरकारी धोरणे आणि योजनांवर प्रश्न उपस्थित करण्यात आले होते. अद्याप या प्रकरणात कोणालाही संशयित घोषित करण्यात आलेले नसून, पोस्टर्समागील संपूर्ण बाबींचा तपास सुरू आहे.

 

दरम्यान, दिल्ली मेट्रोच्या जामा मशीद स्थानकावर सामानाच्या तपासणीदरम्यान एका प्रवाशाच्या हालचालींमुळे सुरक्षा यंत्रणांचे लक्ष वेधले गेले होते. एक्स-रे मशीनमध्ये संशयास्पद आणि जड वस्तू दिसल्यानंतर संबंधित प्रवाशाने तेथून पळून जाण्याचा प्रयत्न केला. मात्र, केंद्रीय औद्योगिक सुरक्षा दलाच्या (सीआयएसएफ) जवानांनी पाठलाग करून त्याला बाहेर पडण्याच्या प्रवेशद्वाराजवळ पकडले.

 

सीआयएसएफने या घटनेची माहिती आपल्या एक्स हँडलवरून दिली. प्रवाशाच्या सामानाची अधिक तपासणी केली असता, त्याच्या अंतर्वस्त्राच्या शिवलेल्या भागात एक अज्ञात पदार्थ लपवून ठेवल्याचे आढळले. आपण क्वालालंपूरमध्ये वास्तव्यास असलेले अनिवासी भारतीय असल्याचे सांगणाऱ्या या प्रवाशाला पुढील तपासासाठी सामानासह पोलिसांच्या ताब्यात देण्यात आले. दिल्ली मेट्रोतील या दोन्ही घटनांमध्ये संबंधित यंत्रणांनी कारवाई केली असून, सरकारविरोधी पोस्टर्सच्या प्रकरणाचा तपास विशेष पथकाकडून केला जात आहे.