दिलजीत दोसांजच्या दिल्ली कॉन्सर्टला अखेर हिरवा कंदील

diljit dosanjh प्रसिद्ध पंजाबी गायक दिलजीत दोसांजच्या चाहत्यांसाठी आनंदाची बातमी आहे. दिल्लीमध्ये ऑक्टोबरच्या अखेरीस होणाऱ्या त्याच्या कॉन्सर्टला अखेर पोलिसांनी परवानगी दिली आहे. सुरक्षेच्या कारणास्तव यापूर्वी या कार्यक्रमाची मंजुरी रोखण्यात आली होती. त्यामुळे चाहत्यांमध्ये संभ्रम निर्माण झाला होता. मात्र, आयोजकांसोबत सुरक्षाव्यवस्थेबाबत अनेक बैठका झाल्यानंतर आणि आवश्यक उपाययोजनांचा सविस्तर आराखडा सादर केल्यानंतर पोलिसांनी कार्यक्रमाला हिरवा कंदील दिला.

 

 

BookMyShow ने स्पष्ट केले की, कॉन्सर्टची परवानगी रद्द करण्यात आली नव्हती, तर सणासुदीच्या काळातील सुरक्षेचा विचार करून ती तात्पुरती स्थगित करण्यात आली होती. आयएएनएसच्या वृत्तानुसार, दिल्ली पोलिसांनी आयोजकांना सुरक्षा, वाहतूक आणि गर्दीचे व्यवस्थापन यांसंदर्भात अतिरिक्त उपाययोजना करण्यास सांगितले होते. त्यानुसार BookMyShow Live च्या टीमने पोलिसांसोबत बैठक घेऊन आवश्यक व्यवस्थांचे नियोजन सादर केले. सर्व नियमांचे पालन करण्याचे आश्वासन मिळाल्यानंतर कार्यक्रमाला मंजुरी देण्यात आली. हा कॉन्सर्ट नियोजित वेळापत्रकानुसार ३० ऑक्टोबर रोजी दिल्लीत होणार असल्याचे कंपनीने स्पष्ट केले आहे.

दिल्लीतील कार्यक्रमानंतर दिलजीत दोसांजच्या कॉन्सर्टचे आयोजन इतर शहरांमध्येही करण्यात येणार आहे. उपलब्ध माहितीनुसार, ५ नोव्हेंबरला लखनऊमधील १९व्या नॅशनल जंबूरी ग्राउंडवर, १५ नोव्हेंबरला इंदूरमधील सी२१ इस्टेट येथे, २१ नोव्हेंबरला अहमदाबादमधील नरेंद्र मोदी स्टेडियमवर, २७ नोव्हेंबरला मुंबईतील महालक्ष्मी रेस कोर्सवर आणि २९ नोव्हेंबरला बंगळुरूमधील नाइस ग्राउंडवर कार्यक्रम होणार आहेत. चंदीगडमधील कार्यक्रमाची तारीख अद्याप जाहीर करण्यात आलेली नाही.

तिकिटांच्या किमतींबाबत दिलेल्या माहितीनुसार, कॉन्सर्टच्या तिकिटांची सुरुवातीची किंमत ६,४९९ रुपये असून सर्वाधिक किमतीचे तिकीट १५,९९९ रुपयांना उपलब्ध आहे. दिल्लीतील कार्यक्रमाला परवानगी मिळाल्याने दिलजीतच्या लाइव्ह परफॉर्मन्सची प्रतीक्षा करणाऱ्या चाहत्यांना दिलासा मिळाला आहे.