'मोदी सरकारच POK भारतामध्ये विलीन करेल!

Modi government itself will merge PoK into India पाकव्याप्त काश्मीर (POK) हा भारताचाच भाग होता आणि भारताचाच राहील असे ठामपणे सांगत, पंतप्रधान नरेंद्र मोदी यांचे सरकारच पीओकेला भारतामध्ये विलीन करेल, असा दावा उत्तर प्रदेशातील कैसरगंज येथील माजी खासदार आणि भाजप नेते ब्रिजभूषण शरण सिंह यांनी केला आहे. काश्मीर संदर्भात फारुक अब्दुल्ला यांनी केलेल्या वक्तव्यावर प्रतिक्रिया देताना ते म्हणाले की, अब्दुल्ला हे निश्चितच चांगले आणि मोठे नेते आहेत, परंतु त्यांच्या विधानांमधून कधीकधी पाकिस्तानबद्दलचे प्रेम उघड होते. या मुद्द्यावर उत्तर प्रदेश सरकारमधील अर्थमंत्री सुरेश खन्ना यांनीदेखील फारुक अब्दुल्ला यांच्यावर निशाणा साधला असून, आज मोदी सरकारच्या काळात काश्मीर देशाच्या मुख्य प्रवाहात पूर्णपणे सामील झाले असल्याचे त्यांनी स्पष्ट केले.

 

 

 

 

याशिवाय, १ नोव्हेंबर रोजी दिल्लीतील रामलीला मैदानावर होणाऱ्या काँग्रेसच्या प्रस्तावित रॅलीवरून व्यापाऱ्यांनी घेतलेल्या हरकतींवर ब्रिजभूषण शरण सिंह यांनी टीका केली. सणांच्या काळात व्यापार प्रभावित होण्याच्या भीतीवर बोलताना, 'दोन-चार दिवसांत काय डोंगर कोसळणार आहे?' असा सवाल करत त्यांनी हे लोक सुट्टीच्या दिवशीच धरणे-आंदोलने करतात असा टोला लगावला. यापूर्वी निवडणूक आयोगाचा बचाव करताना त्यांनी सांगितले होते की, २०२३ पूर्वी निवडणूक आयुक्त निवडण्याची कोणतीही निश्चित प्रक्रिया नव्हती; जर विरोधकांना आक्षेप असेल तर त्यांनी निवडून येऊन नवीन कायदा करावा, परंतु बारंवार घटनात्मक संस्थांवर प्रश्न उपस्थित करणे योग्य नाही. काँग्रेसवर सातत्याने हल्लाबोल करणाऱ्या ब्रिजभूषण यांनी गेल्या काही दिवसांत दिल्लीत झालेल्या आंदोलनामागे एलॉन मस्क यांचा हात असल्याचा दावाही केला होता.