रिडात गोळीबाराचा थरार; ६ मुलांसह १२ जण जखमी

shooting-incident-in-rida अमेरिकेतील फ्लोरिडा राज्याच्या टॅलाहासी शहरात फ्लोरिडा ए अँड एम विद्यापीठाच्या ब्रॅग स्टेडियमजवळ झालेल्या गोळीबारात सहा अल्पवयीन मुलांसह एकूण १२ जण जखमी झाले आहेत. शनिवारी रात्री आठ वाजण्यापूर्वी पेरी आणि मॅनॅटी रस्त्यांच्या चौकाजवळ ही घटना घडली. जखमींमध्ये सहा प्रौढ आणि सहा अल्पवयीन मुलांचा समावेश असल्याची माहिती शहर प्रशासनाने दिली आहे.

 

 

‘यूएसए टुडे’च्या वृत्तानुसार, गोळीबारात ११ जणांना गोळ्या लागल्या, तर एका पीडिताची आजी घटनास्थळावरून पळून जात असताना जखमी झाली. टॅलाहासी पोलीस विभागाने दिलेल्या माहितीनुसार, जखमींपैकी किमान तिघांची प्रकृती गंभीर होती, तर अन्य जखमींची प्रकृती स्थिर असल्याचे सांगण्यात आले.

 

प्राथमिक तपासात गोळीबार होण्यापूर्वी घटनास्थळी झटापट झाल्याचे समोर आले आहे. या घटनेमागील नेमके कारण काय होते आणि गोळीबारासाठी कोण जबाबदार आहे, याचा शोध टॅलाहासी पोलीस विभागाची हिंसक गुन्हे शाखा घेत आहे. तपास अधिकाऱ्यांकडून घटनास्थळावरील पुरावे गोळा करण्यासह प्रत्यक्षदर्शींची माहितीही घेतली जात आहे.

 

टॅलाहासीचे पोलीस प्रमुख लॉरेन्स रेव्हेल यांनी या घटनेत मुलांसह अनेक जण जखमी झाल्याबद्दल चिंता व्यक्त केली. गोळीबारानंतर पीडितांना मदत करण्यासाठी पोलीस अधिकाऱ्यांनी तातडीने धाव घेतल्याचे त्यांनी सांगितले. घटनास्थळ पूर्णपणे सुरक्षित घोषित होण्यापूर्वीच अधिकाऱ्यांनी जखमींना सुरक्षित बाहेर काढून रुग्णालयात पोहोचवण्यासाठी प्रयत्न केले, असेही त्यांनी स्पष्ट केले.

 

या घटनेमुळे पीडित आणि त्यांच्या कुटुंबीयांना मोठा त्रास सहन करावा लागत असल्याचे नमूद करत पोलीस प्रमुखांनी जखमींच्या कुटुंबीयांप्रति सहवेदना व्यक्त केल्या. गोळीबाराची संपूर्ण परिस्थिती स्पष्ट करण्यासाठी पोलीस तपास करत असून, या घटनेबाबत कोणाकडेही माहिती असल्यास त्यांनी पुढे येऊन तपासात सहकार्य करावे, असे आवाहन करण्यात आले आहे. दरम्यान, पोलिसांनी हा तपास प्राथमिक टप्प्यात असल्याचे स्पष्ट केले आहे. पुढील चौकशीत पुरावे आणि साक्षीदारांकडून मिळणाऱ्या माहितीनुसार घटनेशी संबंधित तपशीलांमध्ये बदल होण्याची शक्यता असल्याचेही प्रशासनाने सांगितले.