२०३० पर्यंत ३५ काेटी नोकऱ्या निर्माण हाेणार

 

jobs created उत्तम करिअरचे स्वप्न पाहणाऱ्या तरुणांसाठी एक दिलासादायक बातमी आहे. एका अहवालानुसार, पुढील चार वर्षांत नोकरीच्या बाजारपेठेत महत्त्वपूर्ण बदल होण्याची शक्यता आहे. २०३० पर्यंत भारतातील उत्पादन आणि सेवा केंद्रांमध्ये ३५० दशलक्षांहून अधिक नवीन नोकऱ्या निर्माण होण्याचा अंदाज आहे.

 

ऑटोमोटिव्ह, लॉजिस्टिक्स, टेलिकॉम, स्वच्छ ऊर्जा, वस्त्रोद्योग आणि जल व्यवस्थापन यांसारख्या क्षेत्रांमध्ये कौशल्यांची मागणी सर्वात वेगाने वाढत आहे.इंडिया डिडॅक्टिक्स असोसिएशनने (आयडीए) एका निवेदनात म्हटले आहे की, रोजगाराच्या संधींमधील या प्रचंड वाढीसाठी जलद कौशल्य प्रशिक्षण, प्रात्यक्षिक चाचण्या आणि उद्योग व शिक्षण संस्था यांच्यात मजबूत सहकार्याची आवश्यकता आहे. २०३० पर्यंत वाहन उद्योगात २० ते २५ लाख थेट रोजगार निर्माण होण्याची शक्यता आहे. तर लॉजिस्टिक्स क्षेत्राला ४७ लाख अधिक कुशल कामगारांची गरज भासेल़ तसेच दूरसंचार क्षेत्रात १० लाख नवीन रोजगार निर्माण होण्याची शक्यता आहे. भारताच्या स्वच्छ ऊर्जेकडे होणाऱ्या संक्रमणामुळे २०३० पर्यंत ४४ लाखांहून अधिक पूर्णकालीन रोजगार आणि वस्त्रोद्योग व तयार कपड्यांच्या उद्योगात पुढील तीन वर्षांत सुमारे २ कोटी नवीन रोजगार निर्माण होण्याची शक्यता आहे.

...........