वनडेत शतक झळकावणारी पहिली भारतीय महिला!
दीप्ती शर्माचा इतिहास
Total Views |
मुंबई,
deepiti sharmaभारत आणि झिम्बाब्वे यांच्यातील दुसऱ्या वनडे सामन्यात दीप्ती शर्माने अष्टपैलू कामगिरी करत भारताच्या विजयात महत्त्वाची भूमिका बजावली. फलंदाजीत शतक झळकावल्यानंतर दीप्तीने गोलंदाजीतही तीन विकेट्स घेतल्या. या शानदार कामगिरीसह तिने एक मोठा विक्रम आपल्या नावावर केला आहे.
भारताने या सामन्यात झिम्बाब्वेचा १२१ धावांनी पराभव केला. भारताने प्रथम फलंदाजी करत ५० षटकांत ६ विकेट्स गमावून ३२८ धावा केल्या. लक्षाचा पाठलाग करताना, झिम्बाब्वेचा डाव ४८.५ षटकांत २०७ धावांवर आटोपला.
दीप्ती शर्मा या सामन्यात सहाव्या क्रमांकावर फलंदाजीला आली होती. तिने ८६ चेंडूंत नाबाद १०६ धावांची खेळी केली. या खेळीत तिने १५ चौकार लगावले. दीप्तीने हरमनप्रीत कौरसोबत पाचव्या विकेटसाठी १५३ धावांची महत्त्वाची भागीदारी केली. हरमनप्रीतनेही १२६ धावांची शानदार खेळी केली. या दोघींच्या फलंदाजीमुळे भारताला ३२८ अशी मोठी धावसंख्या उभारता आली.
दीप्तीचं हे वनडे कारकिर्दीतील दुसरं शतक आहे. विशेष म्हणजे, सहाव्या किंवा त्यापेक्षा खालच्या क्रमांकावर फलंदाजी करत वनडेत शतक झळकावणारी ती भारताची पहिली महिला क्रिकेटपटू ठरली आहे. याशिवाय वनडेमध्ये १५० पेक्षा जास्त विकेट्स आणि दोन किंवा त्यापेक्षा जास्त शतके करणाऱ्या भारतीय क्रिकेटपटूंच्या खास क्लबमध्येही दीप्तीने प्रवेश केला आहे.
भारतासाठी अशी कामगिरी करणारी दीप्ती तिसरी क्रिकेटपटू आहे. यापूर्वी सचिन तेंडुलकर आणि मनोज प्रभाकर यांनी हा पराक्रम केला आहे. दीप्ती शर्माने आतापर्यंत १२६ वनडे सामने खेळले असून तिच्या नावावर २८७७ धावा आहेत. यात दोन शतके आणि १८ अर्धशतकांचा समावेश आहे. गोलंदाजीत तिने आतापर्यंत १७१ विकेट्स घेतल्या आहेत.