रजनीकांत यांच्या ‘जेलर २’ची बॉक्स ऑफिसवर घोडदौड
दुसऱ्या रविवारी कमाईचा नवा विक्रम
Total Views |
मुंबई
rajinikanth दाक्षिणात्य चित्रपटसृष्टीचे सुपरस्टार रजनीकांत यांची लोकप्रियता पुन्हा एकदा बॉक्स ऑफिसवरील आकडेवारीतून दिसून येत आहे. त्यांच्या बहुचर्चित ‘जेलर २’ या चित्रपटाने प्रदर्शनाच्या दुसऱ्या आठवड्यातही कमाईचा वेग कायम ठेवला आहे. नव्या चित्रपटांची स्पर्धा असतानाही प्रेक्षकांचा या अॅक्शन-कॉमेडी थ्रिलरला चांगला प्रतिसाद मिळत आहे. विशेष म्हणजे, दुसऱ्या रविवारी दमदार कमाई करत चित्रपटाने तमिळ चित्रपटसृष्टीत नवा विक्रम नोंदवल्याचा दावा केला जात आहे.
चित्रपटाच्या कमाईसंदर्भातील सॅकनिल्कच्या सुरुवातीच्या आकडेवारीनुसार, ‘जेलर २’ने पहिल्या आठवड्यात ३३४.३५ कोटी रुपयांची कमाई केली होती. त्यानंतर प्रदर्शनाच्या नवव्या दिवशी चित्रपटाने १४.४० कोटी रुपये कमावले, तर दहाव्या दिवशी कमाईत वाढ होऊन २४.१५ कोटी रुपयांची भर पडली. दुसऱ्या रविवारी, म्हणजेच प्रदर्शनाच्या अकराव्या दिवशी, चित्रपटाने २५.७० कोटी रुपयांची नेट कमाई केल्याचं वृत्त आहे. या आकडेवारीनुसार, भारतातील चित्रपटाची एकूण नेट कमाई ३९९.७० कोटी रुपयांपर्यंत पोहोचली आहे.
‘जेलर २’च्या दुसऱ्या रविवारच्या कमाईने तमिळ चित्रपटांच्या बॉक्स ऑफिसवरील आधीच्या विक्रमांनाही मागे टाकल्याचं सांगितलं जात आहे. रजनीकांत यांच्याच ‘२.०’ या चित्रपटाने दुसऱ्या रविवारी २४ कोटी रुपयांची नेट कमाई केली होती. ‘जेलर २’ने २५.७० कोटी रुपयांची कमाई करत हा आकडा ओलांडल्याचा दावा करण्यात आला आहे. या यादीत ‘लिओ’ने १६.५५ कोटी, ‘जेलर’ने १६.५० कोटी, ‘पोन्नियिन सेल्वन १’ने १५.७० कोटी, तर ‘द ग्रेटेस्ट ऑफ ऑल टाइम’ने १५ कोटी रुपयांची कमाई केली होती.
दरम्यान, भारतातीलrajinikanth एकूण कमाईच्या बाबतीतही ‘जेलर २’ची आगेकूच सुरू आहे. उपलब्ध आकडेवारीनुसार, ‘२.०’ हा ४०७.०५ कोटी रुपयांच्या नेट कमाईसह तमिळ चित्रपटांच्या यादीत आघाडीवर आहे. त्यानंतर ‘जेलर २’चा क्रमांक असून, त्याने अकरा दिवसांत जवळपास ४०० कोटी रुपयांचा टप्पा गाठला आहे. ‘जेलर’ने ३४८.५५ कोटी, ‘लिओ’ने ३४१.०४ कोटी, ‘कुली’ने २८५.०१ कोटी आणि ‘पोन्नियिन सेल्वन १’ने २६६.५४ कोटी रुपयांची कमाई केल्याचं या यादीत नमूद आहे. याशिवाय ‘द ग्रेटेस्ट ऑफ ऑल टाइम’, ‘विक्रम’, ‘अमरन’ आणि ‘जना नायकन’ या चित्रपटांचाही सर्वाधिक कमाई करणाऱ्या तमिळ चित्रपटांमध्ये समावेश आहे.
‘जेलर २’च्या कमाईचा वेग असाच कायम राहिल्यास ‘२.०’चा विक्रम मोडण्याची शक्यता व्यक्त केली जात आहे. मात्र, चित्रपटाची अंतिम कमाई आणि विक्रमाची अधिकृत स्थिती यासाठी अद्ययावत आकडेवारी महत्त्वाची ठरणार आहे. रजनीकांत यांच्या लोकप्रियतेच्या जोरावर ‘जेलर २’ बॉक्स ऑफिसवर किती मोठा टप्पा गाठतो, याकडे आता चित्रपटप्रेमींचं लक्ष लागलं आहे.