खडीमध्ये हरवलेला इअरबड ChatGPT ने शोधून दिला!

chatgpt helps ChatGPT कृत्रिम बुद्धिमत्तेचा (AI) वापर केवळ माहिती मिळवण्यासाठी किंवा प्रश्नांची उत्तरे जाणून घेण्यासाठीच नव्हे, तर दैनंदिन जीवनातील छोट्या-मोठ्या समस्या सोडवण्यासाठीही होऊ शकतो, याचा प्रत्यय देणारी एक घटना सध्या चर्चेत आहे. उज्जैनमधील महाकाल मंदिरात दर्शनासाठी गेलेल्या मुलाची हरवलेली चप्पल ChatGPT ने शोधून दिल्याची घटना चर्चेत असतानाच, आता या AI टूलने खडीमध्ये हरवलेला एक छोटासा इअरबड शोधण्यात मदत केल्याचा अनुभव समोर आला आहे. या घटनेमुळे सोशल मीडियावर ChatGPT च्या क्षमतेची चर्चा रंगली आहे.

 

 

 

नेमकी घटना एका व्यक्तीसोबत घडली. ही व्यक्ती आपल्या मुलासोबत पार्कमध्ये गेली होती. घरी परतताना मुलाच्या मागे धावत असताना त्याच्या हुडीच्या खिशातून इअरबडची केस खाली पडली. त्यातून डाव्या कानाचा इअरबड बाहेर येऊन बांधकामाच्या ठिकाणी पसरलेल्या खडीमध्ये पडला. खडीमध्ये पडलेली छोटीशी पांढरी वस्तू शोधणे कठीण होते. संबंधित व्यक्तीने जवळपास दहा मिनिटे शोधाशोध केली; मात्र इअरबड काही सापडला नाही. त्यातच संध्याकाळ होत असल्याने परिसरात अंधारही वाढू लागला होता.

अशा परिस्थितीत त्याने ChatGPT ची मदत घेण्याचे ठरवले. खडी पसरलेल्या जागेचे फोटो काढून त्याने ते ChatGPT ला पाठवले. त्यानंतर AI ने त्याला अधिक जवळून आणि झूम करून फोटो पाठवण्यास सांगितले. त्यानुसार त्याने आणखी तीन फोटो पाठवले. या फोटोंचे निरीक्षण करताना ChatGPT ने तिसऱ्या फोटोमध्ये लाल झुडपाजवळ पडलेला पांढरा इअरबड ओळखून दाखवला. इतकेच नव्हे, तर त्या जागेभोवती लाल गोल करून इअरबड नेमका कुठे आहे, हेही स्पष्ट केले.

या व्यक्तीने आपला अनुभव आणि ChatGPT ला दिलेल्या सूचना Reddit या ऑनलाइन मंचावर शेअर केल्या आहेत. त्याच्या म्हणण्यानुसार, सुरुवातीला जवळपास दहा मिनिटे शोधूनही इअरबड सापडला नव्हता; मात्र ChatGPT च्या मदतीने पाच मिनिटांपेक्षाही कमी वेळात त्याला इअरबडची जागा शोधता आली.chatgpt helps त्यामुळे प्रत्यक्ष परिसरातील लहान वस्तू शोधण्यासाठी फोटोच्या मदतीने AI चा वापर कसा करता येऊ शकतो, याचे हे उदाहरण ठरले आहे.

या घटनेची चर्चा सोशल मीडियावर सुरू झाल्यानंतर नेटकऱ्यांनीही मजेशीर प्रतिक्रिया दिल्या आहेत. घरात हरवलेल्या चाव्या, टीव्हीचा रिमोट किंवा मोजे शोधण्यासाठी आता AI ची मदत घ्यावी लागेल, अशा आशयाच्या मिश्किल टिप्पण्या काही वापरकर्त्यांनी केल्या. एका युजरनेही हरवलेल्या वस्तू शोधण्यासाठी ChatGPT चा उपयोग करण्याची वेळ येईल, अशी प्रतिक्रिया दिली. तर दुसऱ्या नेटकऱ्याने गुप्तहेरांच्या चित्रपटांमध्ये दिसणारे डिटेक्टिव्हही AI च्या नजरेसमोर फिके पडतील, अशी टिप्पणी केली.

एखादी छोटी वस्तू खडीमध्ये शोधणे ही साधी वाटणारी बाब असली, तरी योग्य फोटो आणि स्पष्ट सूचना दिल्यास AI दृश्य माहितीचे विश्लेषण करून संभाव्य जागा ओळखण्यात मदत करू शकते, हे या अनुभवातून दिसून आले. अर्थात, अशा प्रकारच्या शोधात फोटोची स्पष्टता, प्रकाश आणि वस्तूचा परिसर यांचाही परिणाम होऊ शकतो. तरीही हरवलेल्या इअरबडचा शोध घेण्यासाठी ChatGPT ने दिलेली मदत सध्या सोशल मीडियावर चर्चेचा विषय ठरत आहे.