मुलांमधील रक्ताच्या कर्करोगाची सुरुवात सामान्य तापासारखी! 'या' लक्षणांकडे दुर्लक्ष करू नका

blood cancer मुलांना ताप येणे, थकवा जाणवणे किंवा अंगदुखी होणे या सामान्य तक्रारी मानल्या जातात. मात्र, ही लक्षणे दीर्घकाळ टिकत असतील किंवा वारंवार दिसत असतील, तर पालकांनी त्याकडे गांभीर्याने लक्ष देणे आवश्यक आहे. मुलांमध्ये आढळणारा रक्ताचा कर्करोग म्हणजेच ल्युकेमियाची सुरुवातीची लक्षणे अनेकदा सामान्य विषाणूजन्य संसर्गासारखी असू शकतात. त्यामुळे आजाराची लक्षणे ओळखणे आणि योग्य वेळी वैद्यकीय सल्ला घेणे महत्त्वाचे ठरते.

 

 

 

प्रौढांमध्ये आढळणाऱ्या काही कर्करोगांचा संबंध तंबाखू, मद्यपान आणि जीवनशैलीशी असू शकतो. मात्र, मुलांमधील रक्ताच्या कर्करोगामागे बहुतांश वेळा पेशींच्या डीएनएमध्ये नैसर्गिकरीत्या होणारे बदल कारणीभूत असतात. काही प्रकरणांमध्ये आनुवंशिक घटकांचाही संबंध असू शकतो. त्यामुळे मुलांच्या आजारासाठी पालकांनी स्वतःला दोष देऊ नये. शरीरातील रक्तपेशी तयार करणाऱ्या अस्थिमज्जेमध्ये (बोन मॅरो) रक्तपेशींची निर्मिती होते. या प्रक्रियेदरम्यान काही पेशींमध्ये अनपेक्षित बदल झाल्यास असामान्य पांढऱ्या रक्तपेशींची वाढ होऊ शकते. अशा पेशींची अनियंत्रित वाढ झाल्यास ल्युकेमिया विकसित होऊ शकतो. मुलांमध्ये आढळणाऱ्या कर्करोगांमध्ये ल्युकेमिया हा प्रमुख प्रकार आहे.

मुलांमध्ये दीर्घकाळ ताप राहणे, ताप वारंवार परत येणे, हाडे किंवा सांध्यांमध्ये सतत वेदना होणे, शरीरावर सूज दिसणे, मान किंवा काखेत गाठी जाणवणे, पोट फुगल्यासारखे वाटणे, असामान्य थकवा, अशक्तपणा आणि त्वचा फिकट पडणे ही काही संभाव्य लक्षणे आहेत. मात्र, ही लक्षणे दिसली म्हणजे रक्ताचा कर्करोगच आहे, असे नाही. मलेरिया, क्षयरोग आणि इतर संसर्गांमध्येही अशी लक्षणे आढळू शकतात.blood cancer त्यामुळे घाबरून न जाता लक्षणे टिकून राहिल्यास किंवा वारंवार दिसल्यास बालरोगतज्ज्ञांचा सल्ला घ्यावा. डॉक्टरांच्या तपासणीनुसार रक्तचाचण्या आणि आवश्यक असल्यास पुढील चाचण्या केल्या जाऊ शकतात. वेळेवर निदान झाल्यास उपचारांचे योग्य नियोजन करता येते. मुलांच्या आरोग्यातील असामान्य बदलांकडे दुर्लक्ष न करता वेळीच वैद्यकीय मदत घेणे हा त्यांच्या आरोग्याच्या दृष्टीने महत्त्वाचा निर्णय ठरू शकतो.