राष्ट्रपती द्रौपदी मुर्मू यांच्या दौऱ्याच्या पार्श्वभूमीवर नाशिक-त्र्यंबकेश्वर मार्ग बंद

nashik-trimbakeshwar सिंहस्थ कुंभमेळ्याच्या पार्श्वभूमीवर ३१ ऑक्टोबर रोजी त्र्यंबकेश्वर येथील कुशावर्त कुंड आणि नवीन घाट परिसरात ध्वजारोहण सोहळ्याचे आयोजन करण्यात आले आहे. या धार्मिक कार्यक्रमाला राष्ट्रपती द्रौपदी मुर्मू उपस्थित राहणार असल्याने नाशिक-त्र्यंबकेश्वर वाहतूक व्यवस्थेत महत्त्वाचे बदल करण्यात आले आहेत. प्रशासनाने दिलेल्या माहितीनुसार, ३० ऑक्टोबर रोजी सकाळी ८ वाजल्यापासून ३१ ऑक्टोबर रोजी रात्री ८ वाजेपर्यंत नाशिक-त्र्यंबकेश्वर मुख्य मार्ग वाहतुकीसाठी बंद ठेवण्यात येणार आहे.

 

 

या कालावधीत नाशिकहून त्र्यंबकेश्वरकडे जाणाऱ्या वाहनचालकांना पर्यायी मार्गाचा वापर करावा लागणार आहे. नेहमीचा सुमारे ३० किलोमीटरचा मार्ग बंद राहणार असल्याने प्रवाशांना जवळपास ५५ किलोमीटरचे अंतर पार करून त्र्यंबकेश्वरला पोहोचावे लागेल. त्यामुळे नियमित मार्गाच्या तुलनेत सुमारे २५ किलोमीटरचा अतिरिक्त प्रवास करावा लागणार आहे.

प्रशासनाने निश्चित केलेल्या पर्यायी मार्गानुसार, वाहनचालकांना अमृत चौक, बारदान फाटा, गोवर्धन, गिरणारे, धोंडेगाव, देवरगाव, वाघेरा फाटा, अंबोली फाटा आणि सापगावमार्गे त्र्यंबकेश्वरला जाता येईल. या मार्गाचा वापर करून प्रवाशांनी आपल्या प्रवासाचे नियोजन करावे, असे आवाहन करण्यात आले आहे.

राष्ट्रपतींच्या उपस्थितीत nashik-trimbakeshwar  होणारा धार्मिक सोहळा आणि संभाव्य गर्दी लक्षात घेऊन वाहतूक कोंडी टाळण्यासाठी पोलीस प्रशासनाने नियोजन केले आहे. वाहनचालकांनी वाहतूक अधिसूचनेचे पालन करावे, पर्यायी मार्गांचा वापर करावा आणि प्रवासासाठी अतिरिक्त वेळ राखून ठेवावा, असे आवाहन पोलीस अधीक्षक डॉ. स्वामी यांनी केले आहे.

त्यामुळे ३० आणि ३१ ऑक्टोबर रोजी नाशिकहून त्र्यंबकेश्वरला जाणाऱ्या नागरिकांनी मुख्य मार्ग बंद असल्याची नोंद घेऊन पर्यायी मार्गाने प्रवास करावा. ऐनवेळी होणारी गैरसोय टाळण्यासाठी प्रवाशांनी आधीच प्रवासाचे नियोजन करणे आवश्यक आहे.