टाटा समूहात मोठी घडामोड! नोएल टाटा सहा कंपन्यांतून बाहेर पडणार

Noel Tata टाटा ट्रस्ट्सचे अध्यक्ष नोएल टाटा हे येत्या १२ नोव्हेंबर रोजी टाटा समूहातील सहा प्रमुख कंपन्यांच्या संचालक मंडळातून बाहेर पडणार आहेत. नोएल टाटा हे ७० वर्षांचे होणार असून, टाटा समूहाच्या बिगर-कार्यकारी संचालकांसाठी लागू असलेल्या निवृत्ती धोरणानुसार त्यांना या पदांचा राजीनामा द्यावा लागणार आहे. मात्र, टाटा समूहाची होल्डिंग कंपनी असलेल्या टाटा सन्सच्या संचालक मंडळावर ते टाटा ट्रस्ट्सचे नामनिर्देशित संचालक म्हणून कायम राहणार आहेत.

 

 

नोएल टाटा हे सध्या टाटा समूहातील अनेक महत्त्वाच्या कंपन्यांमध्ये बिगर-कार्यकारी अध्यक्ष म्हणून जबाबदारी सांभाळत आहेत. यामध्ये ट्रेंट, व्होल्टास, टाटा इन्व्हेस्टमेंट कॉर्पोरेशन, टाटा इंटरनॅशनल आणि ट्रेंट हायपरमार्केट प्रायव्हेट लिमिटेड या कंपन्यांचा समावेश आहे. याशिवाय, दुबईस्थित टाटा इंटरनॅशनल वेस्ट एशिया DMCC या कंपनीचेही ते बिगर-कार्यकारी अध्यक्ष आहेत. टाटा सन्सच्या संचालक मंडळावर ते बिगर-कार्यकारी नामनिर्देशित संचालक म्हणून कार्यरत आहेत.

 

दरम्यान, नोएल टाटा हे ट्रेंट हायपरमार्केट लिमिटेडमध्ये आपली जबाबदारी कायम ठेवणार आहेत. ट्रेंट लिमिटेड आणि ब्रिटनमधील टेस्को यांच्या संयुक्त उपक्रमातून ही कंपनी कार्यरत आहे. या कंपनीच्या माध्यमातून ‘स्टार बाजार’ आणि ‘स्टार डेली’ ही रिटेल स्टोअर्स चालवली जातात. याशिवाय, नोएल टाटा हे टायटन कंपनी आणि टाटा स्टीलचे बिगर-कार्यकारी उपाध्यक्ष आहेत. तसेच, स्पेनमधील फॅशन रिटेल कंपनी इंडिटेक्सशी संबंधित इंडिटेक्स ट्रेंट रिटेल इंडिया प्रायव्हेट लिमिटेडच्या संचालक मंडळावरही ते आहेत.

 

नोएल टाटा यांच्याशी संबंधित या घडामोडी टाटा समूहाच्या नेतृत्वाबाबत महत्त्वाच्या चर्चा सुरू असताना समोर आल्या आहेत. टाटा सन्सचे अध्यक्ष एन. चंद्रशेखरन यांच्या पुनर्नियुक्तीच्या प्रस्तावावर नोएल टाटा यांनी प्रश्न उपस्थित केले आहेत. १७ सप्टेंबर रोजी टाटा सन्सच्या संचालक मंडळाच्या बैठकीत चंद्रशेखरन यांच्या पुनर्नियुक्तीचा प्रस्ताव मंजूर करण्यात आला होता.नोएल टाटा यांनी अलीकडेच टाटा सन्सचे कंपनी सचिव सुप्रकाश मुखोपाध्याय यांना पत्र लिहून फेब्रुवारी २०२७ नंतरही चंद्रशेखरन यांना पुढील पाच वर्षांसाठी अध्यक्षपदी कायम ठेवण्याच्या निर्णयाबाबत आक्षेप नोंदवल्याचे वृत्त आहे. त्यामुळे एका बाजूला नोएल टाटा यांच्या काही संचालकपदांमधून निवृत्तीची प्रक्रिया सुरू असताना, दुसरीकडे टाटा सन्समधील नेतृत्व आणि पुनर्नियुक्तीचा मुद्दाही चर्चेत आला आहे.