मुलीच्या जन्मानंतर रणबीरच्या आयुष्यात आला नवा भक्तीमय दिनक्रम!

ranbir-kapoor बॉलिवूड अभिनेता रणबीर कपूर सध्या आपल्या आगामी ‘रामायण’ चित्रपटामुळे चर्चेत आहे. या चित्रपटात तो प्रभू श्रीरामाची भूमिका साकारणार असून, त्याच्यासोबत साई पल्लवी आणि रवी दुबे हे कलाकारही महत्त्वाच्या भूमिकांमध्ये दिसणार आहेत. दरम्यान, रणबीरने ‘कौन बनेगा करोडपती’च्या दिवाळी विशेष भागात सहभागी होत आपल्या वैयक्तिक आयुष्यातील काही खास गोष्टींचा खुलासा केला. मुलगी रियाच्या जन्मानंतर बदललेला दिनक्रम आणि पत्नी आलिया भट्टसोबतच्या नात्याबाबत त्याने मनमोकळेपणाने संवाद साधला.

आलिया भट्टसोबतच्या नात्याविषयी बोलताना रणबीरने मैत्रीला विशेष महत्त्व दिले. कोणतेही नाते दीर्घकाळ टिकवण्यासाठी प्रेम, विश्वास आणि परस्पर आदर या गोष्टी अत्यंत आवश्यक असल्याचे त्याने सांगितले. रणबीरच्या मते, प्रेमामुळे नात्यात जवळीक निर्माण होते, विश्वासामुळे ते अधिक मजबूत बनते, तर आदरामुळे नात्याचे बंध कायम टिकून राहतात. त्याच्या मते, हीच मूल्ये त्यांच्या नात्याचा भक्कम पाया आहेत.

या कार्यक्रमात रणबीरने आपल्या दैनंदिन आयुष्यातील एका खास सवयीचाही उल्लेख केला. मुलगी रियाच्या जन्मानंतर त्याच्या दिवसाची सुरुवात भक्तीमय वातावरणात होऊ लागली आहे. महानायक अमिताभ बच्चन यांच्याशी संवाद साधताना रणबीरने सांगितले की, तो दररोज सकाळी अमिताभ बच्चन यांच्या आवाजातील हनुमान चालिसा ऐकतो. रणबीर म्हणाला, “माझी मुलगी रिया जन्माला आल्यापासून एकही दिवस असा गेला नाही, जेव्हा आम्ही तुमच्या हनुमान चालिसाने दिवसाची सुरुवात केली नसेल.” रणबीरचे हे बोलणे ऐकल्यानंतर अमिताभ बच्चन यांनीही आनंद व्यक्त केला आणि या गोष्टीचे कौतुक केले. मुलीच्या जन्मानंतर त्याच्या आयुष्यात आलेल्या या बदलाची सध्या चर्चा होत आहे.

रणबीर कपूर आणि आलिया भट्ट यांनी काही वर्षे एकमेकांना डेट केल्यानंतर १४ एप्रिल २०२२ रोजी मुंबईतील निवासस्थानी मोजक्या पाहुण्यांच्या उपस्थितीत विवाह केला. अयान मुखर्जी दिग्दर्शित ‘ब्रह्मास्त्र : पार्ट वन – शिवा’ या चित्रपटाच्या चित्रीकरणादरम्यान दोघांच्या प्रेमसंबंधांना सुरुवात झाली होती. या चित्रपटात अमिताभ बच्चन यांनीही महत्त्वाची भूमिका साकारली होती. लग्नानंतर ६ नोव्हेंबर २०२२ रोजी रणबीर आणि आलिया यांनी आपल्या मुलीचे स्वागत केले. तिच्या आगमनानंतर रणबीरच्या वैयक्तिक आयुष्यात अनेक बदल झाले असून, हनुमान चालिसा ऐकण्याची सवय त्यापैकीच एक असल्याचे त्याने सांगितले.

दरम्यान, रणबीर कपूरच्या आगामी ‘रामायण’ चित्रपटाकडेही चाहत्यांचे लक्ष लागले आहे. दिग्दर्शक नितेश तिवारी यांच्या या महत्त्वाकांक्षी चित्रपटात रणबीर प्रभू श्रीरामाची भूमिका साकारणार आहे. साई पल्लवी सीतेच्या, यश रावणाच्या, तर रवी दुबे लक्ष्मणाच्या भूमिकेत दिसणार आहेत. हा चित्रपट दोन भागांत प्रदर्शित होणार असून, ‘रामायण पार्ट १’ हा ५ नोव्हेंबर २०२६ रोजी जगभरातील चित्रपटगृहांमध्ये प्रदर्शित होणार असल्याचे दिलेल्या माहितीत नमूद करण्यात आले आहे. त्यामुळे रणबीरच्या अभिनयासोबतच त्याच्या भूमिकेबाबतही प्रेक्षकांमध्ये उत्सुकता आहे.