जागतिक शाळांच्या क्रमवारीत धीरूभाई अंबानी इंटरनॅशनल स्कूलची भरारी
जगात नववे स्थान, १३ विद्यार्थ्यांना पूर्ण ४५ गुण
Total Views |
मुंबई
dhirubhai ambani धीरूभाई अंबानी इंटरनॅशनल स्कूलने (डीएआयएस) आंतरराष्ट्रीय शैक्षणिक क्षेत्रात उल्लेखनीय कामगिरी नोंदवली आहे. एज्युकेशन अ‍ॅडव्हायझर्स यूकेने २०२६ च्या आंतरराष्ट्रीय पदविका कार्यक्रमाच्या (आयबीडीपी) निकालांच्या आधारे जाहीर केलेल्या जागतिक क्रमवारीत शाळेने नववे स्थान मिळवले आहे. जागतिक स्तरावरील पहिल्या दहा शाळांमध्ये स्थान मिळवणारी डीएआयएस ही भारतातील एकमेव शाळा ठरल्याचा दावा करण्यात आला आहे. विद्यार्थ्यांच्या सातत्यपूर्ण शैक्षणिक कामगिरीमुळे शाळेने आंतरराष्ट्रीय स्तरावर आपली वेगळी ओळख निर्माण केली आहे.
शाळेच्या इतिहासातील सर्वोच्च सरासरी
डीएआयएसच्या २०२६ च्या विद्यार्थ्यांच्या तुकडीने आयबीडीपी परीक्षेत सरासरी ४०.८ गुण मिळवले आहेत. शाळेच्या इतिहासातील ही सर्वोच्च सरासरी असल्याचे सांगण्यात आले आहे. या तुकडीत एकूण १०५ विद्यार्थी होते. जागतिक क्रमवारीतील पहिल्या दहा शाळांमध्ये आयबीडीपी पूर्ण करणाऱ्या विद्यार्थ्यांची सर्वाधिक संख्या डीएआयएसमध्ये होती, असेही नमूद करण्यात आले आहे.
१३ विद्यार्थ्यांना ४५ पैकी ४५ गुण
शाळेच्या विद्यार्थ्यांनी वैयक्तिक स्तरावरही उल्लेखनीय यश संपादन केले आहे. आयबी डिप्लोमा परीक्षेत तब्बल १३ विद्यार्थ्यांनी ४५ पैकी पूर्ण ४५ गुण मिळवले. याशिवाय, या तुकडीतील जवळपास एकतृतीयांश विद्यार्थ्यांनी जगभरातील सर्वोच्च एक टक्का विद्यार्थ्यांमध्ये स्थान मिळवले आहे.मोठ्या विद्यार्थीसमूहाला उत्कृष्ट शैक्षणिक कामगिरीसाठी तयार करण्याची शाळेची क्षमता या निकालांतून अधोरेखित होत असल्याचे सांगितले जात आहे. विद्यार्थ्यांची मेहनत, शिक्षकांचे मार्गदर्शन आणि पालकांचा पाठिंबा या यशामागील महत्त्वाचे घटक मानले जात आहेत.
‘शिक्षण म्हणजे केवळ गुण मिळवणे नव्हे’
या यशाबद्दल प्रतिक्रिया व्यक्त करताना धीरूभाई अंबानी इंटरनॅशनल स्कूलच्या उपाध्यक्षा ईशा अंबानी म्हणाल्या की, शिक्षण हे केवळ शैक्षणिक उत्कृष्टतेपुरते मर्यादित नसून विद्यार्थ्यांमध्ये जिज्ञासा, सर्जनशीलता, चारित्र्य आणि जगाप्रती जबाबदारीची भावना विकसित करणेही तितकेच महत्त्वाचे आहे.
विद्यार्थी आणि शिक्षकांनी घेतलेली मेहनत, तसेच पालकांचा पाठिंबा आणि प्रोत्साहन देणारे शैक्षणिक वातावरण निर्माण करण्यासाठी केलेले प्रयत्न यांचे हे फलित असल्याचेही त्यांनी नमूद केले.डीएआयएसच्या या निकालांमुळे आंतरराष्ट्रीय अभ्यासक्रमात भारतीय शाळांची कामगिरी पुन्हा चर्चेत आली आहे. जागतिक क्रमवारीतील स्थानासोबतच विद्यार्थ्यांची सरासरी आणि पूर्ण गुण मिळवणाऱ्या विद्यार्थ्यांची संख्या यामुळे शाळेच्या २०२६ च्या निकालांकडे विशेष लक्ष वेधले गेले आहे.