एसटीचा मोठा दिलासा! १,२०० जादा बसेस धावणार

pune st diwali special buses दिवाळीचा सण जवळ येताच पुण्यातून गावी जाणाऱ्या प्रवाशांची लगबग सुरू होते. मात्र, सणासुदीच्या काळात रेल्वेचे आरक्षण मिळणे कठीण होते, तर खासगी बसचे तिकीट दरही मोठ्या प्रमाणात वाढतात. त्यामुळे सर्वसामान्य प्रवाशांना आर्थिक भुर्दंड सहन करावा लागतो. ही अडचण लक्षात घेऊन महाराष्ट्र राज्य मार्ग परिवहन महामंडळाच्या पुणे विभागाने प्रवाशांसाठी यंदा १ हजार २०० जादा बसेस सोडण्याचे नियोजन केले आहे. त्यामुळे दिवाळीत गावी जाणाऱ्या प्रवाशांना दिलासा मिळण्याची शक्यता आहे.

 

 

मिळालेल्या माहितीनुसार, दिवाळीच्या गर्दीच्या पार्श्वभूमीवर या विशेष जादा बसेस ४ ते ७ नोव्हेंबरदरम्यान धावणार आहेत. एकूण १,२०० बसेसपैकी ९०० बसेस विदर्भ, मराठवाडा आणि खान्देश या भागांसाठी सोडण्यात येणार आहेत. या बसेस पिंपरी-चिंचवड आगारातून रवाना होतील.

यापूर्वी या भागांसाठीच्या काही बसेस खडकी कॅन्टोन्मेंट येथून सोडण्यात येत होत्या. मात्र, प्रवाशांची होणारी गैरसोय लक्षात घेऊन यंदा पिंपरी-चिंचवड येथून बससेवा उपलब्ध करून देण्याचे नियोजन करण्यात आले आहे. या ठिकाणी मेट्रोची सुविधा असल्याने प्रवाशांना बसस्थानकापर्यंत पोहोचणे अधिक सोयीचे ठरू शकते.उर्वरित ३०० जादा बसेस पश्चिम महाराष्ट्र आणि कोकणातील मार्गांवर धावणार आहेत. या बसेस स्वारगेट, शिवाजीनगर आणि वाकडेवाडी येथून सोडण्यात येणार असल्याची माहिती आहे. कोल्हापूर, सोलापूर, सांगली आणि सातारा या मार्गांवर प्रवाशांची संभाव्य गर्दी लक्षात घेऊन विशेष बससेवेचे नियोजन करण्यात आले आहे.दिवाळीसाठी विशेष जादा बसेस सोडण्यात येणार असल्या, तरी नियमित बससेवाही सुरू राहणार आहे. त्यामुळे प्रवाशांची गर्दी विभागली जाण्यास मदत होईल, अशी अपेक्षा आहे. प्रवाशांनी शेवटच्या क्षणापर्यंत आरक्षणासाठी थांबण्याऐवजी वेळेत ऑनलाइन तिकीट आरक्षित करावे, असे आवाहन एसटी महामंडळाकडून करण्यात आले आहे.दिवाळीच्या काळात खासगी बसच्या वाढीव दरांमुळे होणारा खर्च टाळण्यासाठी आणि प्रवासाचे नियोजन अधिक सोयीस्कर करण्यासाठी एसटीच्या या जादा बससेवेचा प्रवाशांना फायदा होऊ शकतो.