अभिनेता दिनो मोरियाची सहा तास चौकशी

dino morea मुंबईतील मिठी नदीतील गाळ काढण्याच्या कामातील कथित आर्थिक अनियमिततेप्रकरणी अभिनेता दिनो मोरियाची आर्थिक गुन्हे शाखेने (EOW) सुमारे सहा तास चौकशी केली. चौकशीसाठी ताब्यात घेतल्यानंतर अभिनेत्याला अटक करण्यात आलेली नसून, चौकशी पूर्ण झाल्यानंतर त्याला सोडण्यात आले आहे.

 

 

मिठी नदीतील गाळ काढणे आणि नदीच्या पुनरुज्जीवनासाठी देण्यात आलेल्या कंत्राटांमध्ये कथित गैरव्यवहार झाल्याचा आरोप आहे. या कंत्राटांची प्रक्रिया, संबंधितांना करण्यात आलेली देयके तसेच कंत्राटदार, मध्यस्थ आणि महापालिकेतील अधिकाऱ्यांच्या कथित भूमिकेचा आर्थिक गुन्हे शाखेकडून तपास सुरू आहे. या प्रकरणामुळे मुंबई महापालिकेचे ६५.५४ कोटी रुपयांचे नुकसान झाल्याचा आरोप तपास यंत्रणेकडून करण्यात आला आहे.

तपासादरम्यान करण्यात आलेल्या फोन रेकॉर्डच्या छाननीत दिनो मोरियाचा या प्रकरणाशी संबंधित काही व्यक्तींशी संपर्क असल्याचे तपास अधिकाऱ्यांच्या निदर्शनास आल्याचे सांगण्यात येते. त्यानंतर मे २०२५ मध्ये दिनो मोरिया आणि त्याचा भाऊ सँटिनो मोरिया यांचीही चौकशी करण्यात आली होती. सँटिनो मोरियाच्या ‘यूबीओ राइड्स प्रायव्हेट लिमिटेड’ या कंपनीशी संबंधित आर्थिक व्यवहारांचीही तपासणी करण्यात आल्याची माहिती आहे.

या प्रकरणातील प्रमुख आरोपींपैकी एक असलेल्या केतन कदमने काही रकमेचे हस्तांतरण केल्याचा तपास यंत्रणेचा दावा आहे. २०२५ मध्ये कदमला अटक करण्यात आली होती. तो गाळ काढण्याच्या कंत्राटांशी संबंधित ‘वोडर इंडिया एलएलपी’शी संबंधित असल्याचे तपासात समोर आले आहे. तपासादरम्यान ‘वोडर इंडिया एलएलपी’ आणि ‘यूबीओ राइड्स’ या दोन्ही कंपन्या मुंबईतील वरळी येथील फेमस स्टुडिओजवळील एकाच पत्त्यावरून कार्यरत असल्याचे आढळल्याचे सांगण्यात आले आहे. केतन कदम आणि मोरिया कुटुंबातील कथित आर्थिक संबंधांचाही तपास सुरू आहे.

मिठी नदीतील गाळ dino morea  काढण्याच्या कामातील कथित अनियमिततेच्या चौकशीसाठी आर्थिक गुन्हे शाखेने २०२४ मध्ये विशेष तपास पथकाची (SIT) स्थापना केली होती. या प्रकरणात केतन कदम आणि जयेश जोशी यांच्यासह अनेक जणांना अटक करण्यात आली आहे. कथित आर्थिक व्यवहारांसोबतच मुंबई महापालिकेच्या कंत्राटांशी संबंधित बाबींचीही तपासणी सुरू आहे.

दरम्यान, दिनो मोरियाची चौकशी झाल्यानंतर त्याला सोडण्यात आले असून, त्याला या प्रकरणात अटक झालेली नाही. पुढील तपासात आर्थिक व्यवहार आणि संबंधित व्यक्तींमधील संपर्काबाबत आणखी माहिती समोर येण्याची शक्यता आहे.