अजय देवगणच्या ‘दृश्यम ३’ची बॉक्स ऑफिसवर दणदणीत सुरुवात

drishyam 3 box office अजय देवगणच्या बहुप्रतीक्षित ‘दृश्यम द कन्क्लूजन’ अर्थात ‘दृश्यम ३’ची रिलीजपूर्वीपासूनच मोठी चर्चा रंगली होती. ‘दृश्यम’ या लोकप्रिय फ्रँचायझीचा हा शेवटचा भाग असल्याने चित्रपटाबाबत प्रेक्षकांमध्ये प्रचंड उत्सुकता निर्माण झाली होती. या उत्साहाचा परिणाम अॅडव्हान्स बुकिंगवरही दिसून आला. रेकॉर्डब्रेक अॅडव्हान्स बुकिंगनंतर चित्रपटाने अपेक्षेप्रमाणे बॉक्स ऑफिसवर दमदार सुरुवात केली आहे. या चित्रपटाच्या प्रदर्शनामुळे काही अन्य चित्रपटांचे रिलीजही पुढे ढकलण्यात आल्याचे सांगितले जात आहे.

 

 

अभिषेक पाठक दिग्दर्शित ‘दृश्यम ३’ गांधी जयंतीच्या मुहूर्तावर म्हणजेच २ ऑक्टोबरला देशभरातील चित्रपटगृहांत प्रदर्शित झाला. पहिल्याच दिवशी चित्रपट पाहण्यासाठी थिएटरमध्ये मोठी गर्दी पाहायला मिळाली. प्रदर्शनानंतर चित्रपटाला प्रेक्षक तसेच समीक्षकांकडून सकारात्मक प्रतिसाद मिळत असल्याचे चित्र आहे. सोशल मीडियावर चित्रपटातील संवाद, क्लायमॅक्स आणि कलाकारांच्या अभिनयाची चर्चा होत आहे.

दरम्यान, बॉक्स ऑफिसवरील सुरुवातीच्या आकडेवारीनुसार ‘दृश्यम ३’ने पहिल्या दिवशी ६६.७५ कोटी रुपयांची कमाई केल्याचे समोर आले आहे. सॅकनिल्कच्या अर्ली ट्रेंड रिपोर्टमध्ये हा आकडा देण्यात आला आहे. मात्र, हे प्राथमिक आकडे असून अधिकृत आकडेवारी जाहीर झाल्यानंतर त्यात काही बदल होण्याची शक्यता आहे.

या कमाईसह ‘दृश्यम ३’ने अजय देवगणच्या कारकिर्दीतील सर्वात मोठ्या ओपनिंगचा विक्रम नोंदवल्याचे सांगितले जात आहे. त्याचबरोबर पहिल्या दिवशी सर्वाधिक कमाई करणाऱ्या बॉलिवूड चित्रपटांच्या यादीतही या चित्रपटाचा समावेश झाला आहे. उपलब्ध आकडेवारीनुसार ‘दृश्यम ३’ची ६६.७५ कोटींची ओपनिंग ‘स्त्री २’च्या ६४.८ कोटी, ‘अॅनिमल’च्या ६३.८ कोटी, ‘पठाण’च्या ५७ कोटी, ‘वॉर’च्या ५३.३५ कोटी, ‘वॉर २’च्या ५२.५ कोटी आणि ‘ठग्स ऑफ हिंदोस्तान’च्या ५२.२५ कोटी रुपयांच्या पहिल्या दिवसाच्या कमाईपेक्षा अधिक आहे. त्याच यादीत ‘धुरंधर २’ने १४५ कोटी, ‘आदिपुरुष’ने ८६.७५ कोटी आणि ‘जवान’ने ७५ कोटी रुपयांची ओपनिंग केल्याचे नमूद करण्यात आले आहे.

‘दृश्यम ३’च्या प्रदर्शनामुळे इतर चित्रपटांच्या रिलीजच्या वेळापत्रकावरही परिणाम झाल्याचे दिसून येत आहे. चित्रपटाची क्रेझ लक्षात घेता आयुष्मान खुरानाचा ‘टली उडता तीर’ या चित्रपटाचे प्रदर्शन लांबणीवर टाकण्यात आल्याचे वृत्त आहे. त्यामुळे ‘दृश्यम ३’च्या बॉक्स ऑफिस कामगिरीकडे आता चित्रपटसृष्टीचे लक्ष लागले आहे.