नुसरत भरुचाची प्रकृती चिंताजनक

nushrratt bharuccha बॉलिवूड अभिनेत्री नुसरत भरुच्चाच्या प्रकृतीबाबत सोशल मीडियावर एक चिंताजनक पोस्ट मोठ्या प्रमाणात व्हायरल होत आहे. बाली येथे सुट्टीसाठी गेलेल्या नुसरतचा अपघात झाल्याचा दावा या पोस्टमध्ये करण्यात आला असून, तिच्या मणक्याला दुखापत झाल्याचे सांगितले जात आहे. उपचारासाठी अभिनेत्रीला मुंबईत आणण्यात आले असून, तिच्यावर मणक्याची शस्त्रक्रिया केली जाणार असल्याची माहिती समोर आली आहे. मात्र, शस्त्रक्रिया नेमकी कधी होणार, याबाबत अद्याप अधिकृत माहिती समोर आलेली नाही.

 

 

अभिजीत कुमार नावाच्या एक्स अकाउंटवर नुसरतचा फोटो शेअर करत तिच्या अपघातासंदर्भात पोस्ट करण्यात आली आहे. बालीमध्ये सुट्टीचा आनंद घेत असताना छतावरून पाय घसरल्याने नुसरतचा अपघात झाला आणि तिच्या मणक्याला दुखापत झाली, असा दावा या पोस्टमध्ये करण्यात आला आहे. तसेच, भविष्यात ती आधाराशिवाय स्वतःच्या पायावर उभी राहू शकेल की नाही, याबाबतही गंभीर दावा करण्यात आला आहे. या पोस्टनंतर नुसरतच्या चाहत्यांमध्ये चिंता व्यक्त होत असून, अनेक जण तिच्या प्रकृतीसाठी प्रार्थना करत आहेत.मात्र, सोशल मीडियावरील या दाव्याची स्वतंत्रपणे पुष्टी झालेली नाही. नुसरतच्या टीमकडून मात्र तिच्या प्रकृतीबाबत माहिती देण्यात आली आहे. मणक्याची शस्त्रक्रिया झाल्यानंतर नुसरतला पूर्णपणे सावरण्यासाठी विश्रांतीची आवश्यकता असेल. या दुखापतीचा तिच्या आगामी कामावरही परिणाम होण्याची शक्यता असल्याचे टीमकडून सांगण्यात आले आहे. मात्र, शस्त्रक्रियेची तारीख किंवा तिच्या प्रकृतीबाबत सविस्तर वैद्यकीय माहिती अद्याप जाहीर करण्यात आलेली नाही.

 

 

नुसरत भरुच्चाने आपल्याnushrratt bharuccha  अभिनयाच्या जोरावर अल्पावधीतच प्रेक्षकांच्या मनात वेगळे स्थान निर्माण केले आहे. ‘कल किसने देखा’, ‘ताजमहाल’, ‘लव्ह सेक्स और धोखा’, ‘प्यार का पंचनामा’ आणि ‘अकेली’ यांसारख्या चित्रपटांमध्ये तिने महत्त्वाच्या भूमिका साकारल्या आहेत. अभिनयासोबतच नुसरत सोशल मीडियावरही सक्रिय असते आणि तिचा मोठा चाहतावर्ग आहे. त्यामुळे तिच्या अपघाताची आणि प्रकृतीची माहिती सोशल मीडियावर वेगाने पसरली आहे.

सध्या नुसरतला मणक्याच्या शस्त्रक्रियेसाठी मुंबईत आणण्यात आल्याची माहिती समोर आली आहे. तिच्या प्रकृतीबाबत अधिकृत वैद्यकीय अपडेटची प्रतीक्षा असून, सोशल मीडियावर व्हायरल होत असलेल्या गंभीर दाव्यांबाबत अधिकृत पुष्टी होईपर्यंत सावध राहणे आवश्यक आहे.