गरिबांची दिवाळी अंधारात, रेशनमधून आनंदाचा शिधा गायब

anandacha-shidha दिवाळीच्या काळात रेशन दुकानांतून मिळणारा आनंदाचा शिधा उपलब्ध नसल्याने सर्वसामान्य नागरिकांमध्ये नाराजी व्यक्त होत आहे. आनंदाचा शिधा योजना दुष्काळाच्या झळा सोसणार्‍या गरीब कुटुंबांना शासनाच्या मदतीपासून वंचित राहावे लागत असल्याची भावना व्यक्त होत आहे.

 

सण गोड करण्याच्या अपेक्षेने वाट पाहणार्‍या लाभार्थ्यांच्या पदरी निराशा पडल्याचे चित्र दिसत आहे. महागाई, दुष्काळ आणि सणाचा खर्च गरीबांचे आर्थिक गणित कोलमडले महागाईमुळे आधीच घरखर्च भागवताना सर्वसामान्यांची दमछाक होत आहे. जीवनावश्यक वस्तूंच्या वाढत्या किमती, रोजंदारीवरील अनिश्चित उत्पन्न आणि सणासुदीच्या अतिरिक्त खर्चामुळे गरीब कुटुंबांचे आर्थिक गणित कोलमडले आहे. त्यातच दुष्काळी परिस्थितीमुळे ग्रामीण भागातील शेतकरी, आणि रोजंदारीवर शेतमजूर काम करणार्‍या कुटुंबांसमोर उदरनिर्वाहाचा प्रश्न निर्माण झाला आहे. अशा परिस्थितीत दिवाळीसाठी शासनाकडून मिळणार्‍या ’आनंदाच्या शिध्या’ची अपेक्षा होती. मात्र, रेशन दुकानांत हा शिधा उपलब्ध नसल्याने लाभार्थ्यांचा हिरमोड होत आहे. योजना बंद; गरीब कुटुंबांच्या अपेक्षांवर पाणी दिवाळीच्या निमित्ताने घरात गोडधोड बनवावे, मुलांना आनंद द्यावा आणि कुटुंबासोबत सण साजरा करावा, अशी प्रत्येकाची इच्छा असते. मात्र, हातावर पोट असलेल्या कुटुंबांसाठी सणाचा खर्चही मोठे आवाहन ठरत आहे.

शासनाच्या मदतीमुळे सणाचा भार काही प्रमाणात हलका होईल, अशी अपेक्षा असताना ’आनंदाचा शिधा’च मिळत नसल्याने गरीब कुटुंबांमध्ये नाराजी आहे. एकीकडे दुष्काळामुळे ग्रामीण अर्थव्यवस्थेवर परिणाम होत असताना दुसरीकडे सणासुदीच्या काळात मिळणार्‍या मदतीबाबतही अनिश्चितता निर्माण झाल्याचे चित्र आहे. दिवाळीसारख्या सणात गरजू कुटुंबांना दिलासा देणार्‍या योजनांचा लाभ वेळेत मिळणे आवश्यक आहे. योजना बंद झाली असेल, तर त्यामागील कारणे आणि लाभार्थ्यांसाठी शासनाची पर्यायी व्यवस्था काय आहे, याबाबत प्रशासनाने स्पष्टता देण्याची गरज आहे. दिवाळीच्या काळात मदतीची प्रतीक्षा करणार्‍या गरीब कुटुंबांना केवळ आश्वासनांवर समाधान मानावे लागू नये, यासाठी शासन आणि प्रशासनाने तातडीने लक्ष देण्याची गरज आहे. ’आनंदाचा शिधा’ योजनेची सद्यस्थिती स्पष्ट करून गरजू कुटुंबांना सणासाठी आवश्यक दिलासा द्यावा अशी अपेक्षा व्यक्त होत आहे.