अर्जुन बिजलानीचा शाही ‘तारा व्हिला’!

arjun-bijlanis-regal-tara-villa छोट्या पडद्यावरील लोकप्रिय अभिनेता आणि सूत्रसंचालक अर्जुन बिजलानी सध्या आपल्या नव्या आलिशान फार्महाऊसमुळे चर्चेत आला आहे. मुंबईच्या धावपळीच्या जीवनापासून दूर कर्जत येथे त्याने आपल्या स्वप्नातील घर साकारले आहे. ‘तारा व्हिला’ असे या फार्महाऊसचे नाव असून, त्याची झलक अर्जुनने सोशल मीडियावर चाहत्यांसोबत शेअर केली आहे. पत्नी नेहा स्वामीसोबत त्याने या नव्या वास्तूचे फोटो पोस्ट केले असून, घराची भव्यता आणि निसर्गरम्य परिसराने सर्वांचे लक्ष वेधले आहे.

 

 

या फार्महाऊसची रचना प्रामुख्याने पांढऱ्या रंगावर आधारित आहे. भव्य इमारत, प्रशस्त खोल्या, आकर्षक फर्निचर आणि मोठ्या काचेच्या खिडक्या यामुळे घराला आधुनिक आणि आलिशान स्वरूप मिळाले आहे. लिव्हिंग रूममध्ये पांढऱ्या आणि बेज रंगाच्या सजावटीसोबत निळ्या रंगाचे सोफे आणि खुर्च्या ठेवण्यात आल्या आहेत. घरात भरपूर नैसर्गिक प्रकाश येण्यासाठी मोठ्या खिडक्यांची व्यवस्था करण्यात आली आहे. परिसरातील हिरवळ आणि मोकळ्या जागेमुळे या घराला शांत वातावरणाची जोड मिळाली आहे.

 

घरातील बेडरूमची सजावटही विशेष आकर्षण ठरत आहे. पांढऱ्या रंगाच्या भिंती, आरामदायक बेड आणि जमिनीपासून छतापर्यंत असलेले काचेचे दरवाजे यामुळे खोली अधिक प्रशस्त दिसते. बेडरूमला लागून असलेल्या बाल्कनीतून निसर्गाचे सुंदर दृश्य पाहायला मिळते. याशिवाय जिन्याच्या बाजूला लावलेल्या रंगीबेरंगी नक्षीदार टाइल्समुळे घराच्या सजावटीला वेगळा अंदाज मिळाला आहे. या टाइल्समध्ये भूमध्यसागरीय आणि पोर्तुगीज वास्तुकलेची झलक पाहायला मिळते.

 

फार्महाऊसमधील खास आकर्षण म्हणजे येथील खासगी स्विमिंग पूल. अर्जुनने पत्नी नेहा आणि मुलगा अयानसोबत घालवलेल्या निवांत क्षणांचे फोटोही शेअर केले आहेत. मुलासोबत बोर्ड गेम खेळतानाचे क्षण तसेच पत्नीसोबत पूल परिसरात वेळ घालवतानाची छायाचित्रे चाहत्यांच्या पसंतीस उतरत आहेत. पूलमध्ये ठेवलेल्या हृदयाच्या आकाराच्या ट्रेनेही विशेष लक्ष वेधले आहे. घराच्या बाहेर प्रशस्त अंगण आणि सुंदर बाग असून, कुटुंबासोबत निवांत वेळ घालवण्यासाठी हा परिसर तयार करण्यात आला आहे.

 

‘तारा व्हिला’चे प्रवेशद्वारही तितकेच आकर्षक आहे. पांढऱ्या रंगाच्या भव्य कमानीवर अर्जुन बिजलानीच्या नावाची आद्याक्षरे ‘एबी’ सोनेरी अक्षरांत कोरलेली आहेत. प्रवेशद्वारावरील सोनेरी कळस आणि काळ्या रंगातील नक्षीकाम यामुळे त्याला राजेशाही स्वरूप प्राप्त झाले आहे. बाहेरील टेरेसवर काळ्या-पांढऱ्या नक्षीच्या फरशा, आकर्षक झोपाळा आणि आरामदायक बैठक व्यवस्था करण्यात आली आहे. रात्रीच्या वेळी रोषणाईमुळे या परिसराचे सौंदर्य आणखी खुलून दिसते.

 

आपल्या नव्या घराचे फोटो शेअर करताना अर्जुनने भावनिक संदेशही लिहिला आहे. एखादी जागा केवळ तिच्या सौंदर्यामुळे खास ठरत नाही, तर तिथे आपल्या माणसांसोबत घालवलेले क्षण तिला खऱ्या अर्थाने महत्त्व देतात, अशी भावना त्याने व्यक्त केली. ‘तारा व्हिला’मधील सूर्योदय, गप्पागोष्टी आणि कुटुंबीयांसोबत साजरे होणारे प्रत्येक सोहळे आपल्यासाठी खास असल्याचेही त्याने नमूद केले. अर्जुनच्या या नव्या फार्महाऊसची सध्या सोशल मीडियावर जोरदार चर्चा सुरू आहे.