मुंबई इंडियन्सच्या कोचिंग टीममध्ये मोठे फेरबदल!

mumbai-indians-coaching-team आयपीएल २०२७ च्या हंगामासाठी मुंबई इंडियन्सने आपल्या प्रशिक्षक मंडळाची नव्याने बांधणी केली आहे. संघाच्या प्रशिक्षण व्यवस्थेत महत्त्वाचे बदल करत वेस्ट इंडिजचा माजी अष्टपैलू खेळाडू कायरोन पोलार्ड याच्याकडे मुख्य प्रशिक्षकपदाची जबाबदारी सोपवण्यात आली आहे. त्याच्या मार्गदर्शनाखाली आता अनुभवी खेळाडू आणि प्रशिक्षकांची नवी टीम काम करणार आहे. यामध्ये भारताचा माजी फलंदाज रॉबिन उथप्पा आणि माजी क्षेत्ररक्षण प्रशिक्षक टी. दिलीप यांचा समावेश आहे.

मुंबई इंडियन्सने आगामी हंगामासाठी रॉबिन उथप्पा यांची फलंदाजी प्रशिक्षक म्हणून नियुक्ती केली आहे. तर न्यूझीलंडचा माजी वेगवान गोलंदाज मिचेल मॅकक्लेनघन यांच्याकडे गोलंदाजी प्रशिक्षकपदाची जबाबदारी देण्यात आली आहे. भारतीय संघाचे माजी क्षेत्ररक्षण प्रशिक्षक टी. दिलीप क्षेत्ररक्षण प्रशिक्षक म्हणून काम पाहतील. तसेच धवल कुलकर्णी यांची विकास गोलंदाजी प्रशिक्षक म्हणून नियुक्ती करण्यात आली आहे.

नव्या प्रशिक्षक मंडळातील सर्व सदस्यांना क्रिकेटचा मोठा अनुभव आहे. रॉबिन उथप्पा २००७ मध्ये टी-२० विश्वचषक जिंकणाऱ्या भारतीय संघाचा भाग होते. मिचेल मॅकक्लेनघन यांनी न्यूझीलंडकडून आंतरराष्ट्रीय क्रिकेटमध्ये प्रतिनिधित्व केले आहे. धवल कुलकर्णी यांनाही आंतरराष्ट्रीय क्रिकेटचा अनुभव असून, टी. दिलीप यांनी भारतीय संघासोबत प्रशिक्षक म्हणून काम केले आहे.

विशेष म्हणजे, नव्या प्रशिक्षक मंडळातील रॉबिन उथप्पा, मिचेल मॅकक्लेनघन आणि धवल कुलकर्णी हे तिघेही यापूर्वी मुंबई इंडियन्सकडून खेळले आहेत. त्यामुळे या तिघांचेही संघाशी जुने नाते आहे. दुसरीकडे, कायरोन पोलार्डनेही खेळाडू म्हणून मुंबई इंडियन्ससाठी अनेक महत्त्वपूर्ण कामगिरी केल्या आहेत. आता मुख्य प्रशिक्षक म्हणून त्याच्यावर संघाला मार्गदर्शन करण्याची जबाबदारी असेल.

मुंबई इंडियन्सने २०२० नंतर आयपीएलचे विजेतेपद पटकावलेले नाही. त्यामुळे आगामी २०२७ च्या हंगामात नव्या प्रशिक्षक मंडळासमोर संघाला पुन्हा विजेतेपद मिळवून देण्याचे मोठे आव्हान असणार आहे. खेळाडूंच्या कामगिरीत सुधारणा घडवून आणण्यासोबतच संघाची ताकद वाढवण्यावर नव्या प्रशिक्षकांचा भर राहणार आहे.