विजेचा सापळा रचून चितळाची शिकार

बाकलसर्रा जंगल परिसरात विजेच्या तारांचा सापळा रचून चितळाची शिकार करण्यात आल्याची गोपनीय माहिती वन विभागाला मिळाली. या अधारे वन अधिकार्‍यांनी विशेष पथक तयार करून संबंधित ठिकाणी धाड टाकली. यावेळी घटनास्थळी चितळाची ताजी कापलेली कातडी, मांसाचे तुकडे आणि विजेच्या तारांचे जाळे आढळून आले. पथकाने घटनास्थळाचा पंचनामा करून सर्व साहित्य जप्त केले. या प्रकरणी बाकलसर्रा येथील नरेंद्र श्रीराम चौडाये (२६), दिनेश भरतलाल मेश्राम (२६), राजू भागचंद उईके (३०), भरतलाल किसनलाल मेश्राम (६०) आणि कृष्णा बिसराम चौडाये (५५) यांच्याविरुद्ध वन्यजीव (संरक्षण) अधिनियम १९७२ मधील कलम ९, ३९, ४८, ५० व ५१ अन्वये गुन्हा नोंदविण्यात आला आहे. जप्त करण्यात आलेली कातडी व मांसाचे नमुने तपासणीसाठी पशुधन विकास अधिकारी आणि राज्य न्यायवैद्यक विज्ञान प्रयोगशाळेकडे पाठविण्यात आले आहेत. प्रयोगशाळेच्या अहवालानंतर या प्रकरणातील पुढील तपासाला दिशा मिळणार आहे.