‘विमल इलायची’ जाहिरात प्रकरणी अजय देवगणची हायकोर्टात धाव

Ajay Devgn ‘विमल इलायची’ या ब्रँडच्या जाहिरातीवरून निर्माण झालेल्या वादात बॉलिवूड अभिनेता अजय देवगण याने मुंबई उच्च न्यायालयाचे दार ठोठावले आहे. महाराष्ट्र अन्न व औषध प्रशासनाने (FDA) बजावलेल्या कारणे दाखवा नोटीसला त्याने न्यायालयात आव्हान दिले आहे. दरम्यान, अभिनेता शाहरुख खान आणि टायगर श्रॉफ यांनाही अशाच प्रकारच्या नोटिसा बजावण्यात आल्याची माहिती राज्याचे FDA आयुक्त तुकाराम मुंडे यांनी ३० ऑक्टोबर रोजी प्रसारमाध्यमांशी बोलताना दिली. अजय देवगणने न्यायालयात धाव घेतली असली, तरी विभागाची कायदेशीर प्रक्रिया थांबणार नसल्याचे मुंडे यांनी स्पष्ट केले.

 

 

या प्रकरणातील पुढील कायदेशीर कार्यवाही येत्या आठवड्यात सुरू करण्यात येणार असल्याचे आयुक्तांनी सांगितले. नोटीसला न्यायालयात आव्हान देणाऱ्या अभिनेत्याचे नाव विचारले असता त्यांनी अजय देवगणचा उल्लेख केला. एखाद्या व्यक्तीने न्यायालयीन मार्ग स्वीकारला म्हणून विभागाच्या कारवाईवर परिणाम होणार नाही. FDA नियमानुसार आपली कार्यवाही पुढे सुरू ठेवेल, अशी भूमिका त्यांनी मांडली.

 

 

या प्रकरणाची प्राथमिक चौकशी आणि सुरुवातीची कार्यवाही FDA च्या सहाय्यक आयुक्तांनी पूर्ण केली आहे. तपासात संबंधित जाहिरात कायद्याचे उल्लंघन करत असल्याचे प्रथमदर्शनी आढळून आल्याचे मुंडे यांनी सांगितले. त्यानंतर या प्रकरणाची फाइल सहआयुक्तांकडे पाठविण्यात आली आहे. अशा प्रकरणांमध्ये कायदेशीर कारवाई सुरू करण्याचे तसेच पुढील निर्णय घेण्याचे अधिकार सहआयुक्तांकडे आहेत.

 

 

यापूर्वी ऑगस्ट महिन्यात Ajay Devgn  महाराष्ट्र FDA ने अजय देवगण, शाहरुख खान आणि टायगर श्रॉफ या तिघांना नऊ पानी कारणे दाखवा नोटीस बजावली होती. ‘विमल इलायची’च्या जाहिरातीच्या माध्यमातून प्रत्यक्षात प्रतिबंधित पान मसाला आणि तंबाखूजन्य पदार्थांचा अप्रत्यक्ष प्रचार केला जात असल्याचा विभागाचा आरोप आहे. जाहिरातीमध्ये एका उत्पादनाचे नाव पुढे करून दुसऱ्या प्रतिबंधित उत्पादनाचा प्रचार करण्याच्या या प्रकाराला ‘सरोगेट अ‍ॅडव्हर्टायझिंग’ असे संबोधले जाते.महाराष्ट्रात २०१२ पासून पान मसाला आणि तंबाखूजन्य पदार्थांच्या विक्रीवर बंदी आहे. त्यामुळे अशा उत्पादनांची प्रत्यक्ष अथवा अप्रत्यक्ष जाहिरात करणेही कायदेशीर कारवाईच्या कक्षेत येऊ शकते, असे FDA चे म्हणणे आहे. नोटीसद्वारे तिन्ही अभिनेत्यांना त्यांच्या सोशल मीडिया खात्यांवरून संबंधित जाहिराती हटविण्याचे आणि या प्रकरणात आपली बाजू स्पष्ट करण्याचे निर्देश देण्यात आले होते.आता अजय देवगणने नोटीसविरोधात उच्च न्यायालयात याचिका दाखल केल्याने या प्रकरणाला न्यायालयीन वळण मिळाले आहे. मात्र, न्यायालयीन प्रक्रियेसोबतच विभागाची चौकशी आणि कायदेशीर कार्यवाहीही सुरू राहणार असल्याचे FDA आयुक्त तुकाराम मुंडे यांनी स्पष्ट केले आहे.