सरकार 'लाडकीची दिवाळी गोड' करणार

Ladki Bahin Yojana महाराष्ट्रातील ‘मुख्यमंत्री माझी लाडकी बहीण’ योजनेच्या लाभार्थी महिलांसाठी महत्त्वाची बातमी समोर आली आहे. सप्टेंबर महिन्याच्या हप्त्याची प्रतीक्षा करणाऱ्या महिलांच्या बँक खात्यांमध्ये अखेर १ हजार ५०० रुपये जमा होण्यास सुरुवात झाली आहे. ऑक्टोबर महिना संपत आला तरी सप्टेंबरचा हप्ता मिळालेला नसल्याने लाभार्थी महिलांमध्ये संभ्रम निर्माण झाला होता. अशातच शासनाकडून निधी वितरणाची प्रक्रिया सुरू झाल्याने महिलांना दिलासा मिळाला आहे. दिवाळीच्या पार्श्वभूमीवर ही रक्कम खात्यात जमा होत असल्याने सणाच्या खर्चासाठी महिलांना आर्थिक मदत मिळणार आहे.

 

 

महिला सक्षमीकरणाच्या उद्देशाने राज्य सरकारने सुरू केलेल्या या योजनेंतर्गत पात्र महिलांना दरमहा १ हजार ५०० रुपयांचे आर्थिक सहाय्य दिले जाते. दरम्यान, ऑक्टोबर महिन्यात सप्टेंबर आणि ऑक्टोबर या दोन्ही महिन्यांचे मिळून एकाच वेळी ३ हजार रुपये मिळणार असल्याची चर्चा होती. मात्र, सध्या लाभार्थी महिलांच्या खात्यांमध्ये केवळ सप्टेंबर महिन्याचे १ हजार ५०० रुपयेच जमा केले जात असल्याचे स्पष्ट करण्यात आले आहे. त्यामुळे ऑक्टोबर महिन्याच्या हप्त्याबाबत महिलांना अद्याप प्रतीक्षा करावी लागणार आहे.

सप्टेंबर महिन्याच्या हप्त्याचे वितरण करण्यासाठी सामाजिक न्याय आणि विशेष सहाय्य विभागाकडून महिला व बालविकास विभागाकडे ३४४ कोटी ६२ लाख रुपयांचा निधी वर्ग करण्यात आला होता. हा निधी उपलब्ध झाल्यानंतर संबंधित विभागाने लाभार्थी महिलांच्या खात्यांमध्ये पैसे पाठवण्याची प्रक्रिया सुरू केली आहे. ही रक्कम टप्प्याटप्प्याने थेट लाभ हस्तांतरण (DBT) प्रणालीद्वारे आधार-संलग्न बँक खात्यांमध्ये जमा केली जात आहे. त्यामुळे सर्व पात्र महिलांना एकाच वेळी पैसे मिळण्याऐवजी वेगवेगळ्या टप्प्यांत हप्ता मिळण्याची शक्यता आहे.

दरम्यान, दिवाळीचा सण जवळ आलेला असताना खात्यात जमा होणारी ही रक्कम महिलांसाठी महत्त्वाची ठरत आहे. घरातील दैनंदिन खर्च, किराणा सामान, सणाची खरेदी आणि कुटुंबाच्या इतर गरजांसाठी या पैशांचा उपयोग होऊ शकतो. या योजनेमुळे राज्यातील लाखो महिलांना नियमित आर्थिक आधार मिळत असल्याचे चित्र आहे. सप्टेंबरचा हप्ता मिळण्यास सुरुवात झाल्याने अनेक महिलांनी समाधान व्यक्त केले असून, दिवाळीच्या काळात मिळालेल्या या आर्थिक मदतीमुळे त्यांच्या आनंदात भर पडली आहे.