शाळेच्या भिंतीआड घडला भयंकर प्रकार!

panchkula-crime-news हरियाणातील पंचकुला येथे शाळेच्या आवारात पहिल्या इयत्तेत शिकणाऱ्या विद्यार्थिनीवर तिसऱ्या इयत्तेतील विद्यार्थ्याने केलेल्या कथित प्राणघातक हल्ल्याच्या घटनेने खळबळ उडाली आहे. या घटनेनंतर शाळेतील सुरक्षा व्यवस्था आणि सीसीटीव्ही यंत्रणेच्या कार्यक्षमतेवर गंभीर प्रश्न उपस्थित केले जात आहेत.

 

 

सेक्टर २० मधील शहीद मेजर अनुज राजपूत शासकीय संस्कृती मॉडेल शाळेत ही घटना घडली. पीडित मुलीच्या कुटुंबीयांनी केलेल्या आरोपांनुसार, हल्ला करणाऱ्या तिसऱ्या इयत्तेतील विद्यार्थ्यानेच मुलीच्या वडिलांना ती कुठे जखमी अवस्थेत पडली आहे, याची माहिती दिली. मुलीचे काका फाझिल यांनी सांगितले की, कुटुंबीय मुलीचा शोध घेत शाळेत पोहोचले असता, संबंधित विद्यार्थ्याने त्यांना शाळेच्या पहिल्या मजल्यावर नेले. तेथे मुलगी बेशुद्ध आणि गंभीर जखमी अवस्थेत आढळली.

 

कुटुंबीयांच्या म्हणण्यानुसार, मुलीला तिच्या वडिलांना बोलावण्याच्या बहाण्याने संबंधित विद्यार्थ्याने पहिल्या मजल्यावर नेले होते. त्यानंतर तिच्यावर हल्ला करण्यात आल्याचा आरोप आहे. या घटनेमुळे शाळेतील विद्यार्थ्यांच्या सुरक्षिततेचा मुद्दा ऐरणीवर आला आहे.

 

दरम्यान, शाळेतील सीसीटीव्ही कॅमेऱ्यांच्या देखरेखीबाबतही कुटुंबीयांनी नाराजी व्यक्त केली आहे. शाळेतील सर्व कॅमेऱ्यांवर मुख्याध्यापकांच्या कार्यालयातून लक्ष ठेवले जात असल्यास, एवढी गंभीर घटना घडत असताना ती वेळीच निदर्शनास का आली नाही, असा सवाल त्यांनी उपस्थित केला आहे. घटना सीसीटीव्हीमध्ये कैद झाली असल्यास संबंधित कर्मचाऱ्यांनी वेळीच हस्तक्षेप का केला नाही, याचीही चौकशी करण्याची मागणी कुटुंबीयांकडून होत आहे.

 

शाळेत शिक्षक आणि इतर कर्मचारी उपस्थित असतानाही विद्यार्थिनीला पहिल्या मजल्यावर नेऊन तिच्यावर हल्ला होईपर्यंत कोणालाही याची कल्पना कशी आली नाही, असा प्रश्न कुटुंबीयांनी उपस्थित केला आहे. वेळीच लक्ष गेले असते, तर मुलीला गंभीर दुखापतींपासून वाचवता आले असते, असेही त्यांचे म्हणणे आहे.

 

या प्रकरणाची गंभीर दखल घेत शिक्षण विभागाने चौकशीसाठी विशेष समिती स्थापन केली आहे. हल्ल्यामागील नेमके कारण आणि हेतू जाणून घेण्यासाठी संबंधित विद्यार्थिनीची चौकशी केली जात आहे. तसेच पोलिसांकडून तिची मानसिक तपासणीही केली जाणार असल्याची माहिती अधिकाऱ्यांनी दिली आहे. आता या चौकशीतून घटनेमागील नेमके कारण आणि शाळेच्या सुरक्षा व्यवस्थेतील त्रुटी समोर येतात का, याकडे लक्ष लागले आहे.