गोदावरीच्या तीरावर राष्ट्रपतींचा पूजाविधी; रामकुंडावर भक्तीचा जागर!

President performs a ritual on Godavari आगामी सिंहस्थ कुंभमेळ्याच्या पार्श्वभूमीवर नाशिकमधील गोदाघाटावर शनिवारी धार्मिक उत्साहाचे वातावरण पाहायला मिळाले. राष्ट्रपती द्रौपदी मुर्मू यांच्या उपस्थितीत पवित्र रामकुंडावर विविध धार्मिक विधींना सुरुवात झाली. राष्ट्रपतींच्या हस्ते यज्ञविधी पार पडला. त्यानंतर त्यांनी गोदावरी नदीचे पूजन आणि धर्मध्वजाचे पूजन केले. यावेळी गोदाघाटावर मोठ्या प्रमाणात भाविकांची उपस्थिती होती. धार्मिक मंत्रोच्चार आणि विधींमुळे परिसरात भक्तिमय वातावरण निर्माण झाले होते. सिंहस्थ कुंभमेळ्याच्या अनुषंगाने ३१ ऑक्टोबर रोजी रामकुंड आणि त्र्यंबकेश्वर येथील कुशावर्त तीर्थावर ध्वजारोहणाचे कार्यक्रम आयोजित करण्यात आले आहेत. रामकुंड येथे राष्ट्रपती द्रौपदी मुर्मू यांच्या हस्ते, तर कुशावर्त येथे मुख्यमंत्री देवेंद्र फडणवीस यांच्या हस्ते धार्मिक सोहळा पार पडणार आहे. दुपारी १२ वाजून २ मिनिटांनी महाध्वजारोहणाचा मुहूर्त निश्चित करण्यात आला आहे.

 

 

 

 

या महत्त्वपूर्ण धार्मिक कार्यक्रमाला राज्याचे उपमुख्यमंत्री एकनाथ शिंदे, उपमुख्यमंत्री सुनेत्रा पवार आणि कुंभमेळा मंत्री गिरीश महाजन यांच्यासह अनेक मान्यवर उपस्थित होते. राष्ट्रपतींच्या हस्ते रामकुंडावर मुख्य पूजाविधी पार पडल्यानंतर गोदावरीची आरतीही करण्यात आली. या आरतीच्या वेळी दोन्ही उपमुख्यमंत्री, मंत्री गिरीश महाजन तसेच विविध साधू-महंत उपस्थित होते. राष्ट्रपतींच्या हस्ते गोदावरी पूजन आणि आरती होण्याचा हा सोहळा नाशिकच्या धार्मिक आणि सांस्कृतिक परंपरेच्या दृष्टीने महत्त्वपूर्ण ठरला. या ऐतिहासिक प्रसंगाचे साक्षीदार होण्यासाठी नाशिककरांनीही गोदाघाटावर उपस्थिती लावली.

 

 

सिंहस्थ कुंभमेळ्याच्या तयारीतील धार्मिक कार्यक्रमांना या सोहळ्यामुळे विशेष महत्त्व प्राप्त झाले आहे. रामकुंड आणि कुशावर्त या दोन्ही पवित्र तीर्थक्षेत्रांवरील ध्वजारोहण सोहळ्यांकडे भाविकांचे लक्ष लागले आहे. राष्ट्रपतींच्या उपस्थितीत रामकुंडावर पार पडलेले यज्ञ, गोदापूजन, धर्मध्वज पूजन आणि आरती यामुळे नाशिकच्या धार्मिक वातावरणात उत्साहाचे पर्व सुरू झाले आहे.