ऑरीच्या अंगावर काळेनिळे व्रण

orry प्रसिद्ध कंटेंट क्रिएटर आणि बॉलिवूडमधील सेलिब्रिटींसोबतच्या जवळिकीमुळे कायम चर्चेत असलेला ओरहान अवत्रामाणी अर्थात ऑरी पुन्हा एकदा चर्चेत आला आहे. यावेळी त्याच्या कोणत्याही पार्टीतील फोटोमुळे नव्हे, तर त्याने सोशल मीडियावर शेअर केलेल्या जखमांच्या फोटोंमुळे चाहत्यांचे लक्ष वेधले आहे. ऑरीने आपल्या इन्स्टाग्राम खात्यावर काही फोटो पोस्ट केले असून, त्यामध्ये त्याच्या हातांवर आणि दंडावर मार लागल्याचे, तसेच शरीरावर लाल-काळेनिळे व्रण पडल्याचे दिसत आहे. हे फोटो पाहून त्याच्या चाहत्यांनी चिंता व्यक्त केली आहे.

 

 

ऑरीने या पोस्टमध्ये एकूण सात फोटो शेअर केले आहेत. त्याच्या शरीरावरील जखमा पाहून चाहत्यांकडून त्या नेमक्या कशामुळे झाल्या, असा प्रश्न विचारला जात आहे. मात्र, या जखमा कोणत्याही वेगळ्या घटनेतून झालेल्या नसून ‘खतरों के खिलाडी’ या रिअॅलिटी शोमधील धोकादायक स्टंटदरम्यान झाल्याचे त्याच्या पोस्टवरून स्पष्ट होते. पोस्टसोबत त्याने ‘आजच्या स्टंटमध्ये या जखमा झाल्या’ अशा आशयाची माहिती दिली असून, शेवटी ‘खतरों के खिलाडी’चा हॅशटॅगही वापरला आहे.

या पोस्टमध्ये ऑरीने orry केवळ जखमांविषयी माहिती दिलेली नाही, तर जीवन आणि मृत्यूविषयीही भाष्य केले आहे. स्वतःला मृत्यूच्या अगदी जवळ नेऊन आपण पुन्हा त्यातून परत येऊ शकतो का, हे पाहणे हा एक वेगळाच अनुभव असल्याचे त्याने म्हटले आहे. त्याच्या या विचारांमुळेही पोस्टकडे चाहत्यांचे लक्ष वेधले गेले आहे.ऑरी सध्या ‘खतरों के खिलाडी’च्या नव्या पर्वात स्पर्धक म्हणून सहभागी झाला आहे. या कार्यक्रमात स्पर्धकांना विविध धोकादायक आणि थरारक स्टंट करावे लागतात. त्याच स्टंटदरम्यान ऑरीला या जखमा झाल्याचे समोर आले आहे. त्याने शेअर केलेल्या फोटोंमुळे त्याच्या चाहत्यांना सुरुवातीला चिंता वाटली असली, तरी ही दुखापत शोमधील स्टंटचा भाग असल्याचे स्पष्ट झाले आहे.

दरम्यान, ऑरीच्या या पोस्टमुळे ‘खतरों के खिलाडी’च्या अंतिम फेरीचीही चर्चा रंगली आहे. ऑरी या पर्वाच्या अंतिम फेरीपर्यंत पोहोचला असून त्याच्यासोबत अविनाश मिश्रा, फरहाना भट्ट, करण वाही, ऋत्विक धनजानी, रुबिना दिलैक आणि हर्ष गुजराल हे अन्य सहा स्पर्धक फायनलिस्ट म्हणून निश्चित झाले आहेत. त्यामुळे अंतिम फेरीत ऑरीची कामगिरी कशी राहणार आणि तो कोणते धाडसी स्टंट सादर करणार, याकडे आता प्रेक्षकांचे लक्ष लागले आहे.