पहाटे भूकंपाचा धक्का; ४.५ तीव्रतेची नोंद

assam nagaon earthquake आसाममधील नगाव जिल्ह्यात मंगळवारी पहाटे भूकंपाचा धक्का जाणवला. राष्ट्रीय भूकंप विज्ञान केंद्राच्या (NCS) माहितीनुसार, या भूकंपाची तीव्रता रिश्टर स्केलवर ४.५ इतकी नोंदविण्यात आली. पहाटे ४ वाजून २३ मिनिटे ४७ सेकंदांनी झालेल्या या भूकंपाचा केंद्रबिंदू जमिनीखाली सुमारे ३३ किलोमीटर खोलीवर होता.

 

 

भूकंपाचे धक्के जाणवताच काही भागांतील नागरिकांमध्ये भीतीचे वातावरण निर्माण झाले. मात्र, या घटनेत अद्याप कोणतीही जीवितहानी किंवा मालमत्तेचे नुकसान झाल्याची माहिती समोर आलेली नाही. प्रशासन तसेच संबंधित यंत्रणा परिस्थितीवर लक्ष ठेवून आहेत.

दरम्यान, यापूर्वी शनिवारी सायंकाळीही ईशान्य भारतातील काही भागांना भूकंपाचे धक्के बसले होते. त्या वेळी भूकंपाची तीव्रता ४.९ इतकी नोंदविण्यात आली होती. राष्ट्रीय भूकंप विज्ञान केंद्राने दिलेल्या माहितीनुसार, या भूकंपाचा केंद्रबिंदू भूतानमधील ग्याल्पोझिंगपासून सुमारे तीन किलोमीटर अंतरावर आणि पृथ्वीच्या पृष्ठभागापासून पाच किलोमीटर खोलीवर होता. सायंकाळी ४ वाजून १ मिनिटाने झालेल्या या भूकंपाचे धक्के गुवाहाटीसह अन्य भागांतही जाणवले होते. या घटनेतही कोणत्याही प्रकारची जीवितहानी किंवा नुकसान झाल्याचे वृत्त नव्हते.

 

 

ईशान्य भारत हा भूकंपाच्या दृष्टीने संवेदनशील प्रदेश मानला जातो. आसामसह या परिसरातील अन्य राज्यांमध्येही वेळोवेळी भूकंपाचे धक्के जाणवतात. या भागाची भौगोलिक रचना आणि सक्रिय टेक्टोनिक प्लेट्समुळे येथे भूकंपीय हालचाली सातत्याने होत असतात. भूकंपाची तीव्रता किती आहे, त्याचा केंद्रबिंदू किती खोलीवर आहे आणि केंद्रापासून संबंधित भागाचे अंतर किती आहे, यावर जमिनीवरील परिणामाचे स्वरूप अवलंबून असते. त्यामुळे काही भूकंपांचे धक्के तुलनेने सौम्य असतात, तर काही वेळा त्यांची तीव्रता अधिक जाणवू शकते. भूकंपाच्या वेळी नागरिकांनी सुरक्षित ठिकाणी आश्रय घेऊन धक्के पूर्णपणे थांबेपर्यंत आवश्यक खबरदारी घ्यावी, असे प्रशासनाकडून आवाहन करण्यात येते.