बँक मेळाव्यात महिला बचतगटांना १२.५० लाखांचे कर्ज वितरण

bank-melavyaat-mahila-bachatgatna-loan-distribution महाराष्ट्र राज्य ग्रामीण जीवनोन्नती अभियान (उमेद) व जिल्हा अभियान व्यवस्थापन कक्ष, वाशीम यांच्या वतीने ‘सेवा संकल्प अभियाना’अंतर्गत शिरपूर येथे बँक मेळाव्याचे आयोजन करण्यात आले. ग्रामीण भागातील महिलांना स्वावलंबी व आर्थिकदृष्ट्या सक्षम करण्याच्या उद्देशाने आयोजित या मेळाव्यात महिला बचतगटांना बँक कर्ज तसेच महिलांना विविध शासकीय सुविधांचा लाभ देण्यात ते आला.

 

 

 

या मेळाव्यात ५ महिला बचतगटांना एकूण १२ लाख ५० हजार रुपयांचे बँक कर्ज वितरित करण्यात आले. या कर्जाच्या माध्यमातून महिलांना स्थानिक पातळीवर स्वयंरोजगार तसेच उद्योग-व्यवसाय सुरू करण्यासाठी आर्थिक पाठबळ मिळणार आहे. शेती व्यवसायात सक्रिय असलेल्या २० महिलांना ‘महिला शेतकरी प्रमाणपत्र’ प्रदान करण्यात आले. या प्रमाणपत्रामुळे महिलांना शासनाच्या कृषीविषयक विविध योजना, सेवा-सुविधा, अनुदाने आणि आर्थिक संधींचा थेट लाभ मिळण्याचा मार्ग सुकर होणार आहे.

 

 

‘उमेद’ अभियानाच्या माध्यमातून ग्रामीण महिलांना बचतगटांशी जोडणे, त्यांना डिजिटल तसेच प्रत्यक्ष बँकिंग सुविधा उपलब्ध करून देणे आणि उद्योग-व्यवसायासाठी अर्थसहाय्य मिळवून देणे यावर भर देण्यात येत आहे. महिलांना आर्थिकदृष्ट्या सक्षम करून ‘लखपती दीदी’ बनविण्याच्या दिशेने या उपक्रमामुळे गती मिळत असून, परिसरातील महिलांच्या आर्थिक सक्षमीकरणाला नवीन दिशा मिळत आहे. या बँक मेळाव्यास बँक ऑफ महाराष्ट्रचे शाखा व्यवस्थापक आदर्श, श्रद्धा चक्रे, कृषीमित्र गजानन वानखेडे, शिरपूर प्रभागातील ग्रामसखी तसेच स्थानिक महिला बचतगटांच्या सदस्या मोठ्या संख्येने उपस्थित होत्या.