नानांच्या मनात होती ‘धकधक गर्ल’

nana patekar madhuri dixit ‘धकधक गर्ल’ म्हणून ओळखली जाणारी माधुरी दीक्षित आजही बॉलिवूडमधील लोकप्रिय अभिनेत्रींपैकी एक आहे. तिच्या सौंदर्यापासून अभिनय आणि नृत्यापर्यंत प्रत्येक गोष्टीचे चाहते आहेत. केवळ सर्वसामान्य प्रेक्षकच नव्हे, तर सिनेसृष्टीतील अनेक कलाकारही माधुरीच्या अभिनयाचे आणि व्यक्तिमत्त्वाचे चाहते आहेत. यामध्ये ज्येष्ठ अभिनेते नाना पाटेकर यांचाही समावेश होता. नाना पाटेकर आणि माधुरी दीक्षित यांनी एकत्र कामही केले आहे. मात्र, एका टीव्ही शोमध्ये नानांनी माधुरी आपल्याला किती आवडते, याबाबत केलेला खुलासा आणि तिच्यासाठी लिहिलेली कविता आता पुन्हा चर्चेत आली आहे.

 

 

एका टीव्ही कार्यक्रमात नाना पाटेकर यांनी माधुरी दीक्षितसाठी लिहिलेली कविता स्वतः सादर केली होती. या कार्यक्रमातील व्हिडीओचा एक भाग सध्या सोशल मीडियावर मोठ्या प्रमाणात व्हायरल होत आहे. या व्हिडीओमध्ये नाना माधुरीविषयीच्या आपल्या भावना कवितेतून व्यक्त करताना दिसतात.

माधुरी आपल्याला एकतर्फी आवडते, अशी कबुली नाना पाटेकर यांनी या कार्यक्रमात दिली होती. अर्थात, हे प्रेम तिच्याकडून असू शकत नाही, असेही त्यांनी मिश्कीलपणे स्पष्ट केले. माधुरीसाठी यापूर्वी कविता लिहिली होती; मात्र त्यावेळी ती सर्वांसमोर सादर करता आली नव्हती. आता ती कविता म्हणता येईल, असे सांगत नानांनी कार्यक्रमात ती कविता ऐकवली.

नानांनी सादर केलेल्या या कवितेत माधुरीला आपल्या आयुष्यातील धडधड, संगीत, प्रकाश, ताजेपणा आणि आनंदाशी जोडण्यात आले होते. डोळ्यांपासून आठवणींपर्यंत, झोपेपासून स्वप्नांपर्यंत आणि दिवस-रात्रीपासून विचार व कामापर्यंत आपल्या प्रत्येक गोष्टीत तिचे अस्तित्व असल्याची भावना त्यांनी कवितेतून व्यक्त केली होती. माधुरीला मिळवणं आणि तिला गमावणं, हसणं आणि रडणं, जागणं आणि झोपणं अशा आयुष्यातील प्रत्येक भावनेशी त्यांनी तिची तुलना केली होती. शेवटी तिच्याशिवाय आपण काहीच नसल्याची भावना या कवितेतून व्यक्त करण्यात आली होती.

नाना पाटेकर यांच्या निधनानंतर त्यांच्या आयुष्यातील अनेक आठवणी आणि व्हिडीओ पुन्हा सोशल मीडियावर चर्चेत येत आहेत. त्यात माधुरी दीक्षितसाठी त्यांनी सादर केलेल्या या कवितेचीही भर पडली आहे. व्हिडीओ व्हायरल झाल्यानंतर नेटकऱ्यांनी नानांच्या या रोमँटिक अंदाजाचे कौतुक केले आहे.या व्हिडीओवर प्रतिक्रिया देताना एका युजरने ही कविता ऐकल्यानंतर माधुरी दीक्षितही नानांच्या प्रेमात पडली असती, अशा आशयाची प्रतिक्रिया दिली. तर अन्य एका युजरने नाना पाटेकर यांच्यातील हा रोमँटिक अंदाज आपल्याला यापूर्वी माहिती नव्हता, असे म्हटले. नानांच्या दमदार आणि गंभीर अभिनयाच्या प्रतिमेपलीकडचा त्यांचा हा वेगळा अंदाज पाहून अनेक नेटकऱ्यांनी आश्चर्य व्यक्त केले असून, सोशल मीडियावर त्यांच्या या जुन्या आठवणीला मोठी पसंती मिळत आहे.