सणासुदीला गोडवा होणार 'कडू'

sugar price hike यंदाच्या सणासुदीच्या काळात सर्वसामान्यांच्या खर्चात आणखी वाढ होण्याची शक्यता आहे. गेल्या वर्षीच्या तुलनेत यंदा साखरेच्या दरात तब्बल २० टक्क्यांनी वाढ झाली असून, देशांतर्गत बाजारात साखरेचे भाव गेल्या १९ महिन्यांतील सर्वोच्च पातळीवर पोहोचले आहेत. साखरेच्या वाढत्या दराचा थेट परिणाम ग्राहकांच्या बजेटवर होत असून, आगामी दसरा आणि दिवाळीच्या पार्श्वभूमीवर ही चिंता अधिक वाढली आहे.

 

 

साखरेच्या दरवाढीमागे उत्पादनातील घट हे प्रमुख कारण मानले जात आहे. आंध्र प्रदेश आणि महाराष्ट्र ही देशातील प्रमुख ऊस उत्पादक राज्ये असून, यंदा या दोन्ही राज्यांमध्ये ऊस उत्पादनात घट झाल्याचा प्राथमिक अंदाज आहे. सुमारे २८ ते २९ दशलक्ष टन उत्पादन घटण्याची शक्यता व्यक्त केली जात आहे. याचा परिणाम साखरेच्या उपलब्धतेवर झाला असून, त्यातून बाजारातील दरांवर दबाव निर्माण झाला आहे.

साखरेच्या किमतीत वाढ केवळ भारतापुरती मर्यादित राहिलेली नाही. जागतिक बाजारपेठेतही साखरेच्या दरात तेजी दिसून येत आहे. देशांतर्गत बाजारातील वाढत्या किमतीचा परिणाम साखर उद्योगातील कंपन्यांच्या समभागांवरही झाला आहे. अनेक भारतीय साखर कंपन्यांच्या शेअर्समध्ये अलीकडच्या काळात सुमारे ४ ते ९ टक्क्यांची वाढ नोंदवण्यात आली आहे. त्यामुळे आगामी काळात साखरेचे दर आणखी वाढण्याची शक्यता व्यक्त होत आहे.

ग्राहकांना वाढत्या दरांचा फटका कमी बसावा यासाठी सरकारकडून विविध उपाययोजना केल्या जात आहेत. साखरेचा अतिरिक्त वापर नियंत्रित करण्याच्या दृष्टीने सरकार प्रयत्नशील असून, इथेनॉल निर्मितीसाठी साखरेचा वापर रोखण्याची योजना आखली जात असल्याची माहिती आहे. साखरेचा हा पर्यायी वापर कमी झाल्यास बाजारातील उपलब्धता वाढण्यास मदत होऊ शकते आणि त्यातून वाढत्या किमतींवर नियंत्रण आणण्याचा प्रयत्न केला जात आहे.

दरम्यान, गेल्या काही दिवसांपासून साखरेच्या दरात सातत्याने वाढ होत आहे. ग्राहकांना दिलासा देण्यासाठी सरकारने साखरेच्या साठ्यावर मर्यादाही निश्चित केली आहे. संबंधित नियमांचे उल्लंघन करणाऱ्यांवर कठोर कारवाई करण्याचा इशाराही देण्यात आला आहे. मात्र, आगामी काळात सणासुदीमुळे मागणी वाढण्याची शक्यता असल्याने दरांवरील दबाव कायम राहण्याची शक्यता आहे.

दसरा आणि दिवाळीच्या sugar price hike  काळात पेढे, मिठाई तसेच विविध गोड पदार्थांची मागणी मोठ्या प्रमाणात वाढते. परिणामी साखरेची मागणी वाढल्यास तिच्या किमतीत आणखी वाढ होण्याची शक्यता आहे. त्यातच राज्यात यंदाही दुष्काळी परिस्थिती निर्माण झाल्याने ऊस उत्पादनावर त्याचा परिणाम होण्याची शक्यता आहे. त्यामुळे पुढील काळात साखरेचे उत्पादन आणखी कमी होऊ शकते आणि त्याचा परिणाम बाजारभावावर होण्याची चिंता व्यक्त केली जात आहे.

एकीकडे सणासुदीच्या काळात मिठाई आणि गोड पदार्थांच्या मागणीत वाढ होणार असताना दुसरीकडे साखरेच्या उत्पादनात घट होण्याची शक्यता आहे. त्यामुळे सरकारच्या उपाययोजनांनंतरही साखरेचे दर नियंत्रणात येतात की आगामी काळात आणखी वाढतात, याकडे ग्राहकांसह साखर उद्योगाचे लक्ष लागले आहे.