ईशान किशनचा विक्रमांचा धमाका; सूर्यकुमारला टाकले मागे!

ishan-kishan भारतीय क्रिकेट संघाचा आक्रमक फलंदाज ईशान किशन याने न्यूझीलंडविरुद्धच्या पाचव्या टी२० सामन्यात धडाकेबाज फलंदाजी करत विक्रमांची नोंद केली. अवघ्या ३२ चेंडूंमध्ये ६१ धावांची खेळी साकारत त्याने माजी कर्णधार सूर्यकुमार यादवचा मोठा विक्रम मोडला. टी२० आंतरराष्ट्रीय क्रिकेटमध्ये एका कॅलेंडर वर्षात सर्वाधिक धावा करणारा भारतीय फलंदाज होण्याचा मान आता ईशानने मिळवला आहे.

 

 

काही काळ भारतीय संघाबाहेर राहिल्यानंतर ईशान किशनने २०२६ मध्ये संघात पुनरागमन केले. देशांतर्गत क्रिकेटमधील दमदार कामगिरीच्या जोरावर त्याला पुन्हा भारतीय संघात स्थान मिळाले. मिळालेल्या संधीचे सोने करत त्याने आपल्या फलंदाजीने सातत्याने प्रभाव पाडला आहे. न्यूझीलंडविरुद्धच्या मालिकेतही त्याने आपली आक्रमक शैली कायम ठेवली.

 

मालिकेतील पहिल्या सामन्यात ईशानला दुखापतीमुळे खेळता आले नव्हते. चौथ्या सामन्यात त्याने पुनरागमन केले, मात्र त्याला मोठी खेळी करता आली नाही. पण निर्णायक पाचव्या सामन्यात त्याने शानदार फलंदाजी केली. दुसऱ्या षटकात फलंदाजीला आल्यानंतर त्याने डावाला आकार दिला. त्यानंतर कर्णधार श्रेयस अय्यरसोबत महत्त्वपूर्ण भागीदारी करत धावांचा वेग वाढवला. अवघ्या २८ चेंडूंमध्ये अर्धशतक पूर्ण करणाऱ्या ईशानने ३२ चेंडूंत ६१ धावा फटकावल्या.

 

या खेळीसह ईशानने एका वर्षात टी२० आंतरराष्ट्रीय क्रिकेटमध्ये सर्वाधिक धावा करणाऱ्या भारतीय फलंदाजांच्या यादीत अव्वल स्थान पटकावले. त्याच्या नावावर २०२६ मध्ये आतापर्यंत १,२२० धावा जमा झाल्या आहेत. यापूर्वी हा विक्रम सूर्यकुमार यादवच्या नावावर होता. सूर्यकुमारने २०२२ मध्ये १,१६४ धावा केल्या होत्या. या यादीत २०२६ मध्ये १,१५३ धावा करणारा अभिषेक शर्मा तिसऱ्या क्रमांकावर आहे. अभिषेकने २०२५ मध्ये ८५९, तर संजू सॅमसनने २०२६ मध्ये ८१० धावा केल्या आहेत.

 

ईशानच्या या खेळीने आणखी एका महत्त्वपूर्ण विक्रमाची नोंद झाली. न्यूझीलंडविरुद्धच्या अंतिम सामन्यात ६१ धावा करत त्याने टी२० आंतरराष्ट्रीय क्रिकेटमध्ये दोन हजार धावांचा टप्पा पार केला. विशेष म्हणजे, सर्वात कमी चेंडूंमध्ये दोन हजार धावा पूर्ण करणाऱ्या भारतीय फलंदाजांच्या यादीत तो तिसऱ्या स्थानावर पोहोचला आहे. ईशानने १,३४५ चेंडूंमध्ये हा टप्पा गाठला. अभिषेक शर्मा १,०२४ चेंडूंसह पहिल्या, तर सूर्यकुमार यादव १,१६४ चेंडूंसह दुसऱ्या क्रमांकावर आहे. ईशानच्या या कामगिरीमुळे भारतीय क्रिकेटमध्ये त्याच्या नावाची पुन्हा एकदा जोरदार चर्चा सुरू झाली आहे.