विमान प्रवास महागण्याची चाहूल!

Signs of rising air travel costs हवाई प्रवास करणाऱ्यांच्या खर्चात आगामी काळात वाढ होण्याची शक्यता निर्माण झाली आहे. विमानांसाठी वापरल्या जाणाऱ्या एव्हिएशन टर्बाइन फ्युएल अर्थात एटीएफच्या किमतीत १ नोव्हेंबरपासून पुन्हा वाढ करण्यात आली आहे. सलग चौथ्या महिन्यात इंधन महागले असून, यावेळी दरात सुमारे एक टक्क्याची वाढ झाली आहे. दिल्लीत एटीएफचा दर प्रतिलिटर १३७.१२ रुपयांवरून १३८.५० रुपयांवर पोहोचला आहे. म्हणजेच एका लिटरमागे १.३८ रुपयांची वाढ झाली आहे. याआधी ऑक्टोबरमध्ये एटीएफच्या दरात १३.२२ टक्के म्हणजेच प्रतिलिटर जवळपास १६ रुपयांची मोठी वाढ झाली होती. सलग होत असलेल्या दरवाढीमुळे विमान कंपन्यांच्या आर्थिक गणितावर दबाव वाढण्याची शक्यता आहे.

 

 

 

 

विमान कंपन्यांच्या एकूण परिचालन खर्चामध्ये इंधनाचा वाटा मोठा असतो. एटीएफवर कंपन्यांच्या खर्चापैकी सुमारे ३५ ते ४० टक्के खर्च होतो. त्यामुळे इंधनाच्या किमतीत वाढ झाल्यास विमान कंपन्यांचा खर्चही वाढतो. या अतिरिक्त खर्चाची भरपाई करण्यासाठी कंपन्या विमान तिकिटांवर इंधन अधिभार अर्थात फ्युएल सरचार्ज लागू करू शकतात. तसेच प्रवास भाड्यात बदल करण्याचाही पर्याय त्यांच्याकडे असतो. गेल्या चार महिन्यांपासून सुरू असलेल्या इंधन दरवाढीमुळे कंपन्यांना तिकिटांच्या किमतींचा फेरविचार करावा लागू शकतो.

 

दरम्यान, १ नोव्हेंबरपासून एटीएफ महागले असले तरी सध्या कोणत्याही मार्गावरील विमान तिकिटांच्या दरात तातडीने वाढ करण्यात आलेली नाही. त्यामुळे प्रवाशांना लगेचच महागड्या तिकिटांचा सामना करावा लागणार नाही. मात्र, आगामी काळात विमान इंधनाच्या किमतीत आणखी वाढ सुरू राहिल्यास कंपन्या तिकिटांचे भाडे वाढवू शकतात किंवा इंधन अधिभार लागू करू शकतात. त्यामुळे भविष्यात हवाई प्रवासाचे नियोजन करणाऱ्या प्रवाशांना इंधन दरवाढीवर लक्ष ठेवावे लागणार आहे.