टीम इंडियाचा षटकारांचा विश्वविक्रम; ४०० चा टप्पा पार!

team-india टी२० आंतरराष्ट्रीय क्रिकेटमध्ये भारतीय फलंदाजांनी आपल्या आक्रमक खेळाची ताकद पुन्हा एकदा सिद्ध केली आहे. भारताने एका कॅलेंडर वर्षात ४०० षटकार मारणारा जगातील पहिला संघ होण्याचा ऐतिहासिक पराक्रम केला आहे. न्यूझीलंडविरुद्धच्या पाचव्या आणि अंतिम टी२० सामन्यात भारतीय फलंदाजांनी ११ षटकार लगावले आणि या विक्रमी कामगिरीला गवसणी घातली. विशेष म्हणजे, अवघ्या ४० सामन्यांत भारताने हा टप्पा गाठला.

 

 

हॅमिल्टनच्या सेडन पार्क मैदानावर झालेल्या या सामन्यात भारताच्या फलंदाजांनी षटकारांची आतषबाजी केली. यंदाच्या वर्षात न्यूझीलंडविरुद्ध भारताने तब्बल १४२ षटकार मारले आहेत. एका कॅलेंडर वर्षात एकाच प्रतिस्पर्धी संघाविरुद्ध सर्वाधिक षटकार मारण्याचा हा विक्रम ठरला आहे. भारतीय फलंदाजांच्या वैयक्तिक कामगिरीवर नजर टाकल्यास अभिषेक शर्मा ८६ षटकारांसह आघाडीवर आहे. ईशान किशनने ६०, तर संजू सॅमसनने ५० षटकार मारले आहेत.

 

मात्र, या ऐतिहासिक सामन्यात भारतीय संघाची सुरुवात अपेक्षेप्रमाणे झाली नाही. अवघ्या १९ धावांवर भारताचे दोन फलंदाज बाद झाल्याने संघ अडचणीत सापडला होता. अशा परिस्थितीत ईशान किशन आणि कर्णधार श्रेयस अय्यर यांनी डावाची जबाबदारी सांभाळली. दोघांनी तिसऱ्या विकेटसाठी ९३ धावांची महत्त्वपूर्ण भागीदारी करत भारतीय संघाला सावरले.

 

ईशान किशनने आक्रमक फलंदाजी करत ३१ चेंडूंत ६१ धावा केल्या. त्याच्या खेळीत पाच चौकार आणि पाच षटकारांचा समावेश होता. त्याला साथ देणाऱ्या श्रेयस अय्यरनेही अवघ्या २३ चेंडूंत ५० धावांची तुफानी खेळी केली. त्याने तीन चौकार आणि चार षटकार लगावले. याशिवाय नमन धीरने २३ चेंडूंत ३३, तर नितीश कुमार रेड्डीने १७ चेंडूंत २२ धावांचे योगदान दिले.

 

दरम्यान, न्यूझीलंडचा वेगवान गोलंदाज ॲडम मिल्ने याने अखेरच्या षटकांमध्ये प्रभावी गोलंदाजी करत भारतीय फलंदाजांना रोखले. त्याने अवघ्या १९ धावा देत चार बळी मिळवले. त्यामुळे भारताला २०० धावांचा टप्पा गाठता आला नाही. भारतीय संघाने निर्धारित २० षटकांत आठ गडी गमावून १९१ धावा उभारल्या. मात्र, या डावात झालेल्या ११ षटकारांमुळे भारतीय क्रिकेटच्या इतिहासात एका नव्या विश्वविक्रमाची नोंद झाली.