मुंबई विमानतळावरील एकही विमान नवी मुंबईत हलवणार नाही

Mumbai Airport News मुंबई आणि नवी मुंबई विमानतळांवरील विमानसेवेच्या स्थलांतरावरून सुरू असलेल्या चर्चेला आता महत्त्वाचे वळण मिळाले आहे. मुंबई विमानतळावरून काही आंतरराष्ट्रीय उड्डाणे नवी मुंबई आंतरराष्ट्रीय विमानतळावर हलवण्याच्या प्रस्तावाला मुख्यमंत्री देवेंद्र फडणवीस यांनी स्पष्टपणे विरोध दर्शवला आहे. मुंबई विमानतळावरील एकही विमान नवी मुंबई विमानतळावर स्थलांतरित केले जाणार नाही, अशी ठाम भूमिका त्यांनी मांडली आहे. दोन्ही विमानतळ स्वतंत्रपणे आणि आपापल्या क्षमतेनुसार कार्यरत राहतील, असेही मुख्यमंत्र्यांनी स्पष्ट केले आहे. यासंदर्भात त्यांनी केंद्रीय नागरी उड्डाणमंत्र्यांना पत्र लिहून मुंबई विमानतळाच्या टर्मिनल-1 च्या पुनर्विकासासाठी पर्यायी आराखडा सुचवला आहे. त्यामुळे विमानांचे स्थलांतर करण्याऐवजी टप्प्याटप्प्याने पुनर्विकास करण्यावर राज्य सरकारचा भर असल्याचे दिसून येत आहे.

 

 

मुख्यमंत्री फडणवीस यांनी मुंबई विमानतळाच्या टर्मिनल-1 च्या पुनर्विकासासाठी नियोजनबद्ध पद्धतीचा प्रस्ताव मांडला आहे. या आराखड्यानुसार, सर्वप्रथम टर्मिनल-1B उभारण्यात यावे. त्यानंतर सध्या कार्यरत असलेल्या टर्मिनल-1A मधील सर्व उड्डाणे नव्याने उभारण्यात आलेल्या टर्मिनल-1B मध्ये स्थलांतरित करावीत. टर्मिनल-1A पूर्णपणे रिकामे झाल्यानंतर त्याचे पाडकाम करून त्या जागेचा पुनर्विकास करावा, अशी सूचना त्यांनी केली आहे. या पर्यायी व्यवस्थेमुळे विमानतळावरील सध्याचे कामकाज पूर्णपणे थांबवण्याची गरज भासणार नाही. तसेच विमानसेवा सुरू ठेवूनच पायाभूत सुविधांचा विस्तार करणे शक्य होईल. परिणामी, प्रवाशांची गैरसोय आणि विमान कंपन्यांवरील अतिरिक्त परिचालनाचा ताण कमी करता येऊ शकतो.

दरम्यान, मुंबई विमानतळाचे संचालन करणाऱ्या मुंबई इंटरनॅशनल एअरपोर्ट लिमिटेड (MIAL) या कंपनीने टर्मिनल-1 च्या पुनर्विकासासाठी आंतरराष्ट्रीय विमानसेवेच्या नियोजनात बदल करण्याचा प्रस्ताव दिला होता. या प्रस्तावानुसार, मुंबईतून १४ आंतरराष्ट्रीय शहरांकडे जाणारी आणि या शहरांमधून मुंबईत येणारी उड्डाणे नवी मुंबई आंतरराष्ट्रीय विमानतळावर हलवण्याचे नियोजन करण्यात आले होते. उन्हाळी वेळापत्रक २०२७ पासून या बदलांची अंमलबजावणी करण्याचा विचार होता.

या प्रस्तावित स्थलांतरामध्ये बहरीन, दमाम, ढाका, दोहा, फुजैरा, जकार्ता, जेद्दा, काठमांडू, कुवेत सिटी, मदिना, मस्कत, रास अल खैमाह, रियाध आणि शारजाह या १४ शहरांचा समावेश होता. मात्र, मुंबई विमानतळावरील आंतरराष्ट्रीय उड्डाणे दुसऱ्या विमानतळावर हलवण्याच्या या योजनेला अनेक विमान कंपन्यांनी विरोध केला होता. विमानतळ बदलल्यास प्रवाशांना मोठ्या अडचणींचा सामना करावा लागू शकतो, अशी भीती विमान कंपन्यांकडून व्यक्त करण्यात आली होती.

विशेषतः मुंबई विमानतळावर उतरल्यानंतर किंवा तेथून पुढील प्रवासासाठी कनेक्टिंग फ्लाइट पकडताना विमानतळ बदलण्याची वेळ प्रवाशांवर येऊ शकते. अशा परिस्थितीत मुंबई आणि नवी मुंबई या दोन्ही विमानतळांदरम्यान प्रवास करावा लागणार असल्याने प्रवाशांचा वेळ आणि पैसा दोन्ही खर्च होण्याची शक्यता होती. त्यामुळे प्रस्तावित बदलांमुळे विमान प्रवासाचे नियोजन अधिक गुंतागुंतीचे होऊ शकते, अशी चिंता व्यक्त करण्यात आली होती.या पार्श्वभूमीवर मुख्यमंत्री देवेंद्र फडणवीस यांनी केंद्रीय नागरी उड्डाणमंत्र्यांना पत्र लिहून आपला पर्यायी आराखडा सादर केला आहे. मुंबई विमानतळावरील उड्डाणे नवी मुंबई विमानतळावर हलवण्याऐवजी टर्मिनल-1 चा टप्प्याटप्प्याने पुनर्विकास करावा, अशी राज्य सरकारची भूमिका आहे. मुख्यमंत्र्यांनी मांडलेला हा पर्यायी प्रस्ताव सध्या केंद्रीय नागरी उड्डाण मंत्रालयाच्या विचाराधीन आहे. त्यामुळे या प्रस्तावावर केंद्र सरकार कोणता अंतिम निर्णय घेते, याकडे विमान कंपन्या, प्रवासी आणि विमानतळ प्रशासनाचे लक्ष लागले आहे. मुंबई आणि नवी मुंबई ही दोन्ही विमानतळे स्वतंत्रपणे कार्यरत ठेवण्याच्या राज्य सरकारच्या भूमिकेला केंद्राकडून मंजुरी मिळणार का, हे पाहणे महत्त्वाचे ठरणार आहे.