नागपुरात जुन्या व गंजलेल्या टिनमध्ये तेलाचे पॅकिंग!

Oil packed in rusted tin containers in Nagpur शहरातील खाद्यतेल विक्री आणि पॅकिंग व्यवसायात खाद्य सुरक्षा नियमांचे उल्लंघन होत असल्याचा प्रकार अन्न व औषध प्रशासनाच्या (FDA) तपासणीत उघडकीस आला आहे. खुले खाद्यतेल विक्रीविरोधात राज्याच्या FDA आयुक्तांच्या निर्देशानुसार राबविण्यात आलेल्या विशेष तपासणी मोहिमेत अनेक गंभीर अनियमितता आढळून आल्या आहेत. या कारवाईत एका व्यावसायिकाचे नोंदणी प्रमाणपत्र निलंबित करण्यात आले आहे. तपासणीदरम्यान काही व्यावसायिकांच्या प्रतिष्ठानांमध्ये स्वच्छतेचा अभाव आढळला. विशेष म्हणजे, खाद्यतेलाच्या पॅकिंगसाठी जुन्या आणि गंजलेल्या टिनचा पुनर्वापर केला जात असल्याचेही समोर आले. अशा पद्धतीने तेलाची साठवणूक व पॅकिंग करणे ग्राहकांच्या आरोग्याच्या दृष्टीने धोकादायक ठरू शकते.

 

 

 

या तपासणी मोहिमेदरम्यान एका व्यावसायिकाच्या उत्पादनावर नमूद असलेल्या परवान्याचीही पडताळणी करण्यात आली. त्यावेळी संबंधित परवाना २०१४ पासून जारी असल्याचे आढळले. मात्र, परवाना मिळविताना कथितरीत्या चुकीची कागदपत्रे सादर करण्यात आल्याचा संशय अधिकाऱ्यांनी व्यक्त केला आहे. तसेच संबंधित परवाना केंद्र सरकारच्या अधिकारक्षेत्रातील असल्याचेही स्पष्ट झाले.या प्रकरणाची माहिती संबंधित विभागाला पत्राद्वारे कळविण्यात आली आहे. संबंधित व्यावसायिकाकडून २०१४ पासून चुकीच्या कागदपत्रांच्या आधारे प्रशासनाची दिशाभूल केली जात असल्याचा आरोपही अधिकाऱ्यांनी केला आहे.

 

 

शहरातील विविध तेल विक्री व पॅकिंग केंद्रांच्या तपासणीत स्वच्छता आणि अन्नसुरक्षा मानकांचे उल्लंघन झाल्याचे निदर्शनास आले. या अनियमिततेच्या पार्श्वभूमीवर एका व्यावसायिकाचे नोंदणी प्रमाणपत्र निलंबित करण्यात आले आहे. इतर ठिकाणी आढळलेल्या त्रुटींच्या अनुषंगानेही प्रशासनाकडून पुढील कारवाईची प्रक्रिया सुरू आहे. खाद्यतेलासारख्या दैनंदिन वापरातील वस्तूंच्या उत्पादन, साठवणूक आणि पॅकिंगमध्ये स्वच्छतेचे निकष पाळणे आवश्यक आहे. मात्र, जुन्या गंजलेल्या टिनचा वापर आणि अस्वच्छ वातावरणात सुरू असलेले पॅकिंग यामुळे ग्राहकांच्या आरोग्याबाबत चिंता व्यक्त होत आहे. FDA च्या या मोहिमेमुळे शहरातील खाद्यतेल व्यवसायातील परवाना, स्वच्छता आणि पॅकेजिंग व्यवस्थेतील त्रुटी पुन्हा एकदा समोर आल्या आहेत.