रणवीर सिंगच्या कुटुंबावर दुःखाचा डोंगर

मुंबई
ranveer singh ‘धुरंधर’ चित्रपटामुळे चर्चेत असलेला अभिनेता रणवीर सिंग याच्या कुटुंबावर दुःखाचा डोंगर कोसळला आहे. रणवीरचे आजोबा डॉ. राम हिंगोरानी यांचे वयाच्या ९६व्या वर्षी निधन झाले. ८ नोव्हेंबर रोजी, दिवाळीच्या शुभदिनी त्यांनी अखेरचा श्वास घेतला. त्यांच्या निधनामुळे कुटुंबीयांवर शोककळा पसरली आहे. आजोबांच्या निधनानंतर त्यांची नात सौम्या हिंगोरानी हिने सोशल मीडियावर भावनिक पोस्ट शेअर करत आपल्या भावना व्यक्त केल्या आहेत. दरम्यान, रणवीरने अद्याप आजोबांच्या निधनाबाबत सार्वजनिकरीत्या कोणतीही प्रतिक्रिया दिलेली नाही. मात्र, त्याच्या जुन्या व्हिडिओमुळे आजोबा आणि नातवामधील जिव्हाळ्याच्या नात्याची पुन्हा चर्चा सुरू झाली आहे.

रणवीर सिंगने २०२३ मध्ये ‘रॉकी और रानी की प्रेम कहानी’ या चित्रपटाच्या प्रमोशनदरम्यान आजोबांसोबतचा एक खास व्हिडिओ सोशल मीडियावर शेअर केला होता. या व्हिडिओमध्ये तो ‘क्या झुमका’ या गाण्यावर आजोबांसोबत थिरकताना दिसत होता. आजोबांसोबतचा त्याचा हा आनंदी क्षण चाहत्यांच्या पसंतीस उतरला होता. रणवीरचे आपल्या आजोबांवर किती प्रेम होते, याची झलक या व्हिडिओतून पाहायला मिळाली होती. आता त्यांच्या निधनानंतर हा व्हिडिओ पुन्हा सोशल मीडियावर व्हायरल होत आहे.

सौम्या हिंगोरानी हिने मंगळवारी रात्री सोशल मीडियावर आजोबांसोबतचे काही छायाचित्रे आणि व्हिडिओ शेअर केले. त्यासोबत लिहिलेल्या भावनिक संदेशातून तिने आजोबांसोबतच्या आठवणींना उजाळा दिला. ९६ वर्षांचे आयुष्य ही शोक करण्याची नव्हे, तर आनंदाने साजरी करण्याची गोष्ट असल्याचे तिने म्हटले आहे. तिच्या मते, आजोबा डॉ. राम यांनी दिवाळीच्या दिवशी शांतपणे या जगाचा निरोप घेतला आणि आपल्या आजीकडे प्रस्थान केले. जगाचा निरोप घेण्यासाठी त्यांनी यापेक्षा अधिक शुभ वेळ निवडली नसती, असेही तिने नमूद केले.

लक्ष्मीपूजन सुरू असताना दिवसातील सर्वाधिक सुंदर आणि सोनेरी क्षणी आजोबांनी अखेरचा श्वास घेतल्याचे सौम्याने आपल्या पोस्टमध्ये म्हटले आहे. आजोबा आणि आजी दोघेही आपल्या आवडत्या खुर्च्यांवर बसून व्हिस्कीचा आस्वाद घेत असतील आणि कुटुंबातील सर्वांना एकत्र पाहून आनंदी होत असतील, अशी कल्पनाही तिने व्यक्त केली. जगातील सर्वोत्कृष्ट आजोबा असल्याबद्दल आणि आयुष्यात सर्व काही दिल्याबद्दल तिने त्यांचे आभार मानले. पुन्हा भेट होऊन एकत्र नृत्य करण्याची वेळ येईपर्यंत आपल्यासाठी आईस्क्रीमचा एक स्कूप राखून ठेवावा, अशी भावनिक विनंतीही तिने केली. आपल्या संदेशाचा शेवट तिने ‘हरी ओम’ या शब्दांनी केला.

रणवीर सिंगदेखील अनेकदा आजोबांप्रती असलेले प्रेम सोशल मीडियावर व्यक्त करत असे. त्याने आजोबांसोबतचे अनेक फोटो आणि व्हिडिओ यापूर्वी चाहत्यांसोबत शेअर केले होते. ‘रॉकी और रानी की प्रेम कहानी’ चित्रपटाच्या प्रमोशनच्या काळात त्याने आजोबांसोबत केलेला डान्स विशेष चर्चेत आला होता. याशिवाय, रणवीरने आजोबांचे काही छायाचित्रेही शेअर केली होती. त्यामध्ये डॉ. राम हिंगोरानी यांनी ‘टीम रॉकी’ असे लिहिलेला टी-शर्ट परिधान केला होता.

विशेष म्हणजे, वयाच्या ९३व्या वर्षीही डॉ. राम हिंगोरानी यांचा उत्साह तरुणांना लाजवेल असा होता. रणवीरने शेअर केलेल्या एका व्हिडिओमध्ये ते मजेशीर अंदाजात ‘टिक्की सोडा, माझ्यासाठी थोडी टकीला घेऊन या!’ असे म्हणताना दिसले होते. हे फोटो शेअर करताना रणवीरने आजोबांचे वर्णन अस्सल ‘रॉकी’ शैलीतील व्यक्तिमत्त्व असे केले होते. ‘आजोबा अगदी अस्सल रॉकी स्टाईलमध्ये आहेत. वयाच्या ९३व्या वर्षीही एकदम जबरदस्त!’ अशा आशयाचे कॅप्शन त्याने या छायाचित्रांना दिले होते.

आजोबांच्या निधनानंतर रणवीरकडून अद्याप कोणतीही अधिकृत प्रतिक्रिया आलेली नसली, तरी त्याने यापूर्वी शेअर केलेले व्हिडिओ आणि छायाचित्रे पुन्हा चर्चेत आली आहेत. त्यातून डॉ. राम हिंगोरानी यांचे उत्साही व्यक्तिमत्त्व आणि रणवीरसोबतचे त्यांचे प्रेमळ नाते अधोरेखित होत आहे. सौम्या हिंगोरानीच्या भावनिक पोस्टमुळेही या दुःखद प्रसंगात कुटुंबाने जपलेल्या आठवणींची हृदयस्पर्शी बाजू समोर आली आहे.