अर्चना पूरन सिंह आणि परमीत सेठी पुन्हा अडकणार विवाहबंधनात

archana-puran-singh छोट्या पडद्यावरील चर्चित रिॲलिटी शो ‘पती, पत्नी और पंगा सीझन २’ सध्या प्रेक्षकांच्या पसंतीस उतरत आहे. या शोमधील जोडप्यांची धमाल, मस्ती आणि एकमेकांसोबतची नोकझोक प्रेक्षकांचे मनोरंजन करत आहे. शो अधिक रंजक बनवण्यासाठी निर्मातेही नवनवीन ट्विस्ट आणत आहेत. आता प्रेक्षकांना आणखी एक खास सरप्राइज मिळणार आहे. बॉलिवूड आणि टेलिव्हिजनमधील लोकप्रिय जोडी अर्चना पूरन सिंह आणि परमीत सेठी पुन्हा एकदा विवाहबंधनात अडकणार आहेत. विशेष म्हणजे, यावेळी त्यांचा विवाहसोहळा मोठ्या थाटामाटात पार पडणार आहे.

 

 

अर्चना पूरन सिंह यांनी स्वतःच त्यांच्या दुसऱ्या लग्नाची माहिती दिली. शोच्या सेटवर पापाराझींशी संवाद साधताना त्यांनी मिश्किल अंदाजात पुन्हा लग्न करत असल्याने पार्टी द्यायला हवी, असे म्हटले. त्यानंतर त्यांनी आपण आणि परमीत १२ डिसेंबर रोजी पुन्हा एकदा लग्न करणार असल्याचा खुलासा केला. पहिल्यांदा विवाह झाला तेव्हा तो अत्यंत खासगी स्वरूपात पार पडला होता. त्यावेळी कुटुंबातील मोजके सदस्यच उपस्थित होते. त्यामुळे यावेळी कुटुंबीय, मित्रमंडळी आणि जवळच्या व्यक्तींसोबत लग्नाचा आनंद साजरा करण्याची दोघांची इच्छा आहे.

 

अर्चना आणि परमीत यांच्या पहिल्या लग्नाची कहाणीही तितकीच खास आहे. दोघांनी १९९२ मध्ये विवाह केला होता. त्यावेळी त्यांनी आपल्या नात्याबाबत सार्वजनिक गाजावाजा न करता अत्यंत साधेपणाने लग्न केले. विवाहसोहळ्यात फार कमी लोक सहभागी झाले होते आणि कोणताही मोठा समारंभ आयोजित करण्यात आला नव्हता. आता जवळपास ३४ वर्षांनंतर ही जोडी पुन्हा एकदा विवाहाच्या विधी पार पाडणार आहे. पहिल्यांदा अपूर्ण राहिलेला लग्नसोहळ्याचा आनंद यावेळी कुटुंबीय आणि मित्रपरिवारासोबत साजरा करण्याचा त्यांचा प्रयत्न असणार आहे.

 

शोच्या सेटवर पुन्हा लग्न करण्याच्या विषयावर बोलताना परमीत सेठी यांनीही विनोदी प्रतिक्रिया दिली. ‘चूक होते,’ असे ते मिश्किलपणे म्हणाले. त्यावर अर्चना यांनीही हसत, यावेळी तीच चूक पुन्हा करणार असल्याचे सांगितले; मात्र यावेळी मोठ्या संख्येने लोकांच्या उपस्थितीत हा सोहळा होणार असल्याचेही त्यांनी स्पष्ट केले. लग्नातील सर्व कार्यक्रम मोठ्या स्तरावर आयोजित केले जाणार आहेत. संगीत, जल्लोष आणि पारंपरिक विधी अशा विविध कार्यक्रमांमुळे हा विवाहसोहळा भव्य स्वरूपाचा असणार आहे.

 

दरम्यान, ‘पती, पत्नी और पंगा’च्या पहिल्या पर्वातही निर्मात्यांनी प्रेक्षकांना असाच खास अनुभव दिला होता. त्या वेळी अभिनेत्री अविका गौर आणि तिचे पती मिलिंद चंदवानी यांच्या लग्नाचे आयोजन शोमध्ये करण्यात आले होते. त्यांच्या विवाहसोहळ्याचीही मोठी चर्चा झाली होती. आता दुसऱ्या पर्वात अर्चना आणि परमीत यांच्या पुन्हा होणाऱ्या लग्नामुळे शोची रंगत आणखी वाढणार आहे. या लोकप्रिय जोडीचा १२ डिसेंबर रोजी होणारा भव्य विवाहसोहळा पाहण्यासाठी चाहते उत्सुक आहेत.