त्र्यंबकेश्वर मंदिरात महिला सुरक्षारक्षकाच्या कानशिलात लगावल्याचा आरोप

trimbakeshwar-temple-security-incidentबारा ज्योतिर्लिंगांपैकी एक असलेल्या नाशिक जिल्ह्यातील त्र्यंबकेश्वर मंदिरात भाविक आणि सुरक्षारक्षकांमधील वादाची घटना पुन्हा एकदा समोर आली आहे. दर्शनानंतर मंदिराच्या सभामंडपात बराच वेळ थांबलेल्या एका भाविकाला बाहेर जाण्याची विनंती केल्यानंतर हा वाद झाल्याचे सांगण्यात येत आहे. यावेळी संबंधित भाविकाने महिला सुरक्षारक्षकाच्या कानशिलात लगावल्याचा आरोप असून, या घटनेचा व्हिडिओ सोशल मीडियावर प्रसारित होत आहे. महिला सुरक्षारक्षकाने दिलेल्या तक्रारीनंतर त्र्यंबकेश्वर पोलिसांनी अज्ञात भाविकाविरोधात गुन्हा दाखल केला आहे.

 

 

दिवाळीच्या सुट्ट्यांमुळे त्र्यंबकेश्वर मंदिरात सध्या भाविकांची मोठी गर्दी होत आहे. गर्दीचे नियोजन करताना दर्शन घेतलेल्या भाविकांना मंदिर परिसरातून बाहेर जाण्याची विनंती सुरक्षारक्षकांकडून केली जाते. संबंधित भाविकाने दर्शन घेतल्यानंतरही सुमारे ५० मिनिटे मंदिराच्या सभामंडपात थांबून राहिल्याची माहिती मंदिर प्रशासनाने दिली आहे. त्याला बाहेर जाण्यास सांगितल्यानंतर त्याचा सुरक्षारक्षकांशी वाद झाला. या वादादरम्यान महिला सुरक्षारक्षकाला मारहाण झाल्याचा आरोप करण्यात आला आहे.

या घटनेची मंदिर प्रशासनाने गंभीर दखल घेतली आहे. महिला सुरक्षारक्षकाच्या तक्रारीच्या आधारे अज्ञात भाविकाविरोधात त्र्यंबकेश्वर पोलीस ठाण्यात गुन्हा नोंदविण्यात आला असून, पोलीस या प्रकरणाचा पुढील तपास करीत आहेत. मंदिराची रचना पुरातत्त्व विभागाच्या निकषांनुसार असल्याने गर्दीचे व्यवस्थापन करताना अनेक मर्यादा येतात. दररोज सुमारे १५ ते १८ हजार भाविकांना दर्शनाची व्यवस्था केली जाते, अशी माहिती मंदिर संस्थानचे विश्वस्त पुरुषोत्तम कडलक यांनी दिली.

भाविक आणि सुरक्षारक्षकांमधील वादाची ही पहिलीच घटना नाही. यापूर्वीही मंदिर परिसरात अशा प्रकारचे प्रसंग घडले आहेत. सुरक्षारक्षकांकडून भाविकांना धक्काबुक्की किंवा मारहाण झाल्याच्या घटनांवरही प्रशासनाने कारवाई केली असल्याचे कडलक यांनी स्पष्ट केले. मंदिरातील शिस्त आणि गर्दीचे नियोजन राखताना सुरक्षारक्षकांच्या वर्तनाबाबतही प्रशासनाने जबाबदारीने भूमिका घेतल्याचे त्यांनी सांगितले.

दरम्यान, गेल्या वर्षी ऑगस्ट महिन्यातही त्र्यंबकेश्वर मंदिरात वाद निर्माण झाला होता. काही भाविकांनी मंदिर व्यवस्थापकांना धक्काबुक्की केल्यानंतर संस्थानच्या खासगी सुरक्षारक्षकांनी भाविकांना मारहाण केल्याचा प्रकार घडला होता. या घटनेत आठ ते दहा भाविक जखमी झाले होते. त्यावेळी भाविकांना मारहाण आणि धक्काबुक्की होत असल्याचा व्हिडिओही सोशल मीडियावर व्हायरल झाला होता.

वारंवार घडणाऱ्या अशा घटनांमुळे त्र्यंबकेश्वर मंदिरातील सुरक्षा व्यवस्था, गर्दी नियंत्रण आणि भाविकांशी सुरक्षारक्षकांकडून केल्या जाणाऱ्या वर्तनाबाबत पुन्हा प्रश्न उपस्थित होत आहेत. धार्मिक स्थळावरील शिस्त राखताना भाविकांची सुरक्षितता आणि सुरक्षारक्षकांची जबाबदारी या दोन्ही बाबींचा समतोल राखण्याचे आव्हान मंदिर प्रशासनासमोर उभे राहिले आहे.