‘स्टुडंट ऑफ द इयर’मध्ये यंदा खुनाचा थरार!

student-of-the-year कॉलेजमधील मैत्री, प्रेम, स्पर्धा आणि ग्लॅमर यांचे चित्रण करणाऱ्या ‘स्टुडंट ऑफ द इयर’ या फ्रँचायझीने यावेळी वेगळ्या विषयाला हात घातला आहे. ‘स्टुडंट ऑफ द इयर: आफ्टर डार्क’ या सहा भागांच्या मालिकेत कॉलेजमधील झगमगाटापेक्षा खून, गूढ घटना, संशयास्पद नाती आणि वैयक्तिक महत्त्वाकांक्षा यांवर अधिक भर देण्यात आला आहे. अभिनेत्री शनाया कपूरच्या दुहेरी भूमिकेमुळे या मालिकेबाबत उत्सुकता निर्माण झाली आहे.

या मालिकेचे लेखन, दिग्दर्शन आणि निर्मिती रीमा माया यांनी केली आहे. देबाशीष इरेंगबाम यांनी सहलेखन आणि सहनिर्मितीची जबाबदारी सांभाळली आहे. धर्माटिक एंटरटेनमेंटच्या या प्रकल्पाला करण जोहर, आदर पूनावाला आणि अपूर्वा मेहता यांचे पाठबळ लाभले आहे. सोमेन मिश्रा आणि रीमा माया यांनी कार्यकारी निर्माते म्हणून काम पाहिले आहे.

टेरेसा कॉलेजमध्ये शिकणाऱ्या आयेशा मलिकच्या अचानक झालेल्या मृत्यूने मालिकेच्या कथेला सुरुवात होते. आयेशाची जुळी बहीण अदिती ही तिच्या मृत्यूमागील सत्य शोधण्याचा निर्धार करते. बहिणीच्या मृत्यूचे गूढ उकलण्यासाठी ती कॉलेजमधील विद्यार्थ्यांवर लक्ष ठेवू लागते. या तपासादरम्यान तिला अनेक धक्कादायक गोष्टी समजतात. कॉलेजमध्ये दिसणारी मैत्री आणि जवळीक यामागे अनेक गुपिते दडलेली असल्याचे तिच्या लक्षात येते.

अदितीचा तपास पुढे सरकत असताना आयेशाच्या वैयक्तिक आयुष्यातील अनेक अनोळखी पैलू समोर येतात. प्रत्येक पात्राच्या वागण्यामागे काही ना काही कारण असल्याचे दिसते. कॉलेजमधील विद्यार्थ्यांची महत्त्वाकांक्षा, स्वार्थ आणि एकमेकांवरील अविश्वास यामुळे कथेत सतत नवे वळण येते. मात्र, सुरुवातीला निर्माण झालेली उत्कंठा मालिकेच्या अखेरपर्यंत अपेक्षित प्रभाव टिकवू शकत नाही.

या मालिकेतील आयेशा आणि अदिती या दोन्ही भूमिका शनाया कपूरने साकारल्या आहेत. स्वभावाने वेगळ्या असलेल्या या दोन बहिणींमधील फरक दाखवण्याचे आव्हान तिने स्वीकारले आहे. आयेशाचे लोकप्रिय व्यक्तिमत्त्व आणि अदितीची भावनिक अवस्था या दोन्ही बाजू पडद्यावर मांडण्याचा तिने प्रयत्न केला आहे. विशेषतः बहिणीच्या मृत्यूनंतर अदितीच्या मनात निर्माण होणारे दुःख, एकटेपणा, संशय आणि सत्य शोधण्याची धडपड तिने प्रभावीपणे साकारली आहे. तिच्या अभिनयात आणखी सुधारणा होण्यास वाव असला, तरी ही भूमिका तिच्यासाठी वेगळे काही करण्याची संधी ठरली आहे.

अनुभवी कलाकारांचीही महत्त्वाची भूमिका

दिविक शर्मा, अभिनव सिंग, मान्या ग्रोव्हर, दिया दामिनी आणि आदी मलिक यांनी कॉलेजमधील विविध व्यक्तिरेखा साकारल्या आहेत. याशिवाय शीबा चड्ढा, खालिद सिद्दिकी, नीरज काबी आणि विवेक गोम्बर यांसारख्या अनुभवी कलाकारांच्या अभिनयामुळे मालिकेला अधिक खोली मिळाली आहे. पात्रांमधील मैत्री, संशय आणि वैयक्तिक स्वार्थ यांची गुंतागुंत कथेला वेगळे वळण देते. वरवर साधे वाटणारे प्रसंगही पुढे महत्त्वाचे ठरतात.

दिग्दर्शन आणि पटकथेतील उणिवा

दिग्दर्शिका रीमा माया यांनी कॉलेजमधील पारंपरिक प्रेमकथा आणि ग्लॅमरच्या चौकटीबाहेर जाऊन रहस्यप्रधान कथा मांडण्याचा प्रयत्न केला आहे. पात्रांच्या भावनिक संघर्षासोबतच गूढ वातावरण निर्माण करण्यावर त्यांनी लक्ष केंद्रित केले आहे. मात्र, काही प्रसंगांमधील भावनिक परिणाम अपेक्षेप्रमाणे साधता आलेला नाही. मालिकेची मूळ संकल्पना आकर्षक असली, तरी पटकथेत काही त्रुटी जाणवतात. काही घटनांमागील कारणे अधिक स्पष्ट करता आली असती. काही पात्रांची पार्श्वभूमी आणि त्यांचे वागण्यामागील हेतू पुरेशा तपशिलाने समोर येत नाहीत. त्यामुळे महत्त्वाच्या प्रसंगांचा प्रभाव काही प्रमाणात कमी होतो. संपादनाच्या बाबतीतही मालिका काहीशी कमकुवत ठरते. काही दृश्ये अनावश्यकपणे लांबवण्यात आल्याने कथानकाचा वेग मंदावतो. थरारपटात प्रत्येक प्रसंगातून नवा सुगावा किंवा उत्कंठा निर्माण होणे अपेक्षित असते; मात्र काही दृश्यांमध्ये तसे घडत नाही.

पाहण्यासारखी आहे का मालिका?

‘स्टुडंट ऑफ द इयर: आफ्टर डार्क’ ही मालिका पारंपरिक कॉलेज कथेला खून आणि रहस्याची जोड देण्याचा वेगळा प्रयत्न करते. शनाया कपूरची दुहेरी भूमिका आणि कलाकारांचा अभिनय ही तिची जमेची बाजू आहे. मात्र, संथ कथानक, काही अपूर्ण प्रसंग आणि पटकथेतील त्रुटींमुळे अपेक्षित थरार निर्माण होत नाही. कॉलेजमधील रोमान्स आणि ग्लॅमरपेक्षा गूढ घटना, गुंतागुंतीची नाती आणि अनपेक्षित वळणांच्या कथा आवडणाऱ्या प्रेक्षकांना ही मालिका एकदा पाहता येईल.