सलमानला टक्कर देणारा ‘मातृभूमी’चा मेजर कोण?

matrubhumi सलमान खानच्या आगामी ‘मातृभूमी’ चित्रपटाचा ट्रेलर प्रदर्शित झाल्यानंतर प्रेक्षकांमध्ये चित्रपटाबाबत उत्सुकता वाढली आहे. ट्रेलरमध्ये सलमान खान चिनी सैन्याशी संघर्ष करताना दिसत असून, त्याच्यासमोर उभ्या ठाकलेल्या चिनी लष्करातील मेजरच्या भूमिकेनेही सर्वांचे लक्ष वेधून घेतले आहे. ही भूमिका साकारणारा अभिनेता अनुप बिक्रम शाही सध्या चर्चेत आला आहे. हिंदी चित्रपटसृष्टीसाठी तो नवा चेहरा असला, तरी नेपाळी मनोरंजन विश्वात त्याने आधीच स्वतःची वेगळी ओळख निर्माण केली आहे.

अनुप बिक्रम शाही हा नेपाळी चित्रपटसृष्टीतील लोकप्रिय अभिनेत्यांपैकी एक आहे. त्याची उंच शरीरयष्टी, आकर्षक व्यक्तिमत्त्व आणि पडद्यावरील दमदार अभिनयामुळे तो विशेषतः खलनायकाच्या भूमिकांसाठी ओळखला जातो. विशेष म्हणजे, त्याला सुरुवातीपासून नायक बनण्याची इच्छा होती; मात्र नकारात्मक भूमिकांमधूनच त्याला अधिक प्रसिद्धी मिळाली. कोणतीही चित्रपटसृष्टीची पार्श्वभूमी नसताना त्याने स्वतःच्या मेहनतीने मनोरंजन क्षेत्रात स्थान निर्माण केले.

काठमांडूमध्ये जन्मलेल्या अनुपने मॉडेलिंगपासून आपल्या कारकिर्दीला सुरुवात केली. २०१३ मध्ये त्याने ‘मॅनहंट इंटरनॅशनल नेपाळ’ स्पर्धेचे विजेतेपद पटकावले. त्यानंतर २०१६ मध्ये चीनमधील शेन्झेन येथे झालेल्या आंतरराष्ट्रीय स्पर्धेत नेपाळचे प्रतिनिधित्व केले. या स्पर्धेत त्याला ‘बेस्ट टीव्ही मॉडेल’ हा पुरस्कार मिळाला. यामुळे मॉडेलिंग क्षेत्रात त्याची ओळख अधिक मजबूत झाली.

मॉडेलिंगमध्ये यश मिळवल्यानंतर अनुपने अभिनय क्षेत्राकडे मोर्चा वळवला. २०१३ मध्ये ‘सौर्य’ या नेपाळी चित्रपटातून त्याने सिनेसृष्टीत पदार्पण केले. मात्र, २०१४ मध्ये प्रदर्शित झालेल्या ‘हसिया’ या चित्रपटातील खलनायकाच्या भूमिकेमुळे त्याला खरी लोकप्रियता मिळाली. त्यानंतर ‘बीर बिक्रम’, ‘किंग’, ‘क्री’, ‘लिली बिली’, ‘जय शंभू’, ‘पुरानो बुलेट’, ‘पासवर्ड’, ‘लक्ष्ये’ आणि ‘लप्पन छप्पन २’ यांसारख्या चित्रपटांमध्ये त्याने काम केले. आपल्या अभिनयासोबतच स्टायलिश व्यक्तिमत्त्वामुळेही तो नेपाळी चित्रपटसृष्टीत चर्चेत राहिला आहे.

चित्रपटांबरोबरच अनुपने छोट्या पडद्यावरही काम केले आहे. नेपाळमधील लोकप्रिय रिअॅलिटी शो ‘हिमालयन रोडीज’मध्ये तो गँग लीडरच्या भूमिकेत दिसला होता. त्याच्या स्पष्टवक्तेपणामुळे आणि प्रभावी व्यक्तिमत्त्वामुळे या कार्यक्रमातही त्याने प्रेक्षकांचे लक्ष वेधले. अभिनयाव्यतिरिक्त त्याने राजकारणातही प्रवेश केला असून, २०२२ मध्ये नेपाळी काँग्रेस पक्षात सहभाग घेतला होता.

आता ‘मातृभूमी’च्या माध्यमातून अनुपला हिंदी चित्रपटसृष्टीत स्वतःची ओळख निर्माण करण्याची संधी मिळाली आहे. या चित्रपटातील चिनी लष्कराच्या मेजरच्या भूमिकेसाठी जगभरातील शेकडो कलाकारांच्या ऑडिशन्स घेण्यात आल्या होत्या. दिग्दर्शक अपूर्व लाखिया यांनी ट्रेलर प्रदर्शनावेळी अनुपची निवड अनेक कलाकारांमधून झाल्याचे सांगितले. विशेष म्हणजे, अनुप हा सलमान खानचा मोठा चाहता आहे. ट्रेलर लाँचच्या कार्यक्रमात त्याने सलमानच्या पायांना स्पर्श करून आदर व्यक्त केला होता. हा प्रसंग सोशल मीडियावरही चर्चेचा विषय ठरला होता.

अनुपच्या वैयक्तिक आयुष्याबाबतही एकेकाळी चर्चा रंगली होती. त्याचे नाव माजी मिस नेपाळ आणि मॉडेल मलिना जोशी हिच्यासोबत जोडले गेले होते. दोघांनी ‘राणी’ या चित्रपटात एकत्र काम केले होते. सुमारे दोन वर्षे एकमेकांना डेट केल्यानंतर त्यांचे मार्ग वेगळे झाल्याचे सांगितले जाते. सध्या अनुप आपल्या अभिनय कारकिर्दीवर लक्ष केंद्रित करत आहे. अपूर्व लाखिया दिग्दर्शित ‘मातृभूमी’ हा चित्रपट ४ डिसेंबर रोजी चित्रपटगृहांमध्ये प्रदर्शित होणार आहे. या चित्रपटात सलमान खानसमोर उभ्या राहणाऱ्या अनुप बिक्रम शाहीच्या भूमिकेकडे आता प्रेक्षकांचे लक्ष लागले आहे.