छटपूजेसाठी BEST च्या २२ जादा बस

chhath puja मुंबईतील रेल्वे स्थानकांवर छटपूजेच्या निमित्ताने सार्वजनिक ध्वनिक्षेपकांवर मोठ्या आवाजात भोजपुरी गाणी वाजवली जात असल्याने नव्या वादाला तोंड फुटले आहे. रेल्वे प्रशासनाच्या या निर्णयावर काही प्रवासी आणि नागरिकांनी नाराजी व्यक्त केली असून, मनसे आणि उद्धवसेनेनेही याविरोधात आवाज उठवला आहे. छटपूजेला आपला विरोध नसून, सार्वजनिक ठिकाणी एका विशिष्ट सांस्कृतिक कार्यक्रमाच्या नावाखाली ध्वनिक्षेपकांवर मोठ्या आवाजात गाणी लावण्याच्या पद्धतीला विरोध असल्याचे संबंधितांनी स्पष्ट केले आहे. या वादामुळे मुंबईतील राजकीय वातावरण तापले असतानाच, छटपूजेसाठी येणाऱ्या भाविकांची गर्दी लक्षात घेऊन बेस्ट प्रशासनाने विशेष बससेवेचे नियोजन केले आहे.

 

 

छटपूजेनिमित्त समुद्रकिनारे, तलाव आणि चौपाट्यांवर जाणाऱ्या भाविकांची संभाव्य गर्दी लक्षात घेऊन १५ आणि १६ नोव्हेंबर २०२६ रोजी एकूण २२ अतिरिक्त बसगाड्या चालवण्याचा निर्णय बेस्टने घेतला आहे. रविवार, १५ नोव्हेंबर रोजी दुपारी दोन वाजल्यापासून विशेष बससेवा सुरू होणार असून, सायंकाळच्या वेळेत १५ जादा बसगाड्या सेवेत दाखल होतील. सांताक्रूझ पश्चिम, अंधेरी पश्चिम, मजास डेपो, मालवणी डेपो आणि बोरिवली पश्चिम येथून जुहू बीचच्या दिशेने या बस धावणार आहेत. बसमार्ग क्रमांक २३१, २०३, ३३९, ए-२५६ आणि ए-२०३ या मार्गांवर अतिरिक्त फेऱ्यांचे नियोजन करण्यात आले आहे.

सोमवार, १६ नोव्हेंबर रोजी सकाळी सहा ते साडेसात या वेळेत सहा ते सात अतिरिक्त बसगाड्या चालवण्यात येणार आहेत. जुहू बीच आणि जुहू बसस्थानक येथून सांताक्रूझ पश्चिम, अंधेरी पश्चिम आणि बोरिवली पश्चिम या भागांकडे परतीची बससेवाही उपलब्ध करून दिली जाणार आहे. जुहू बीच, दादर चौपाटी, पवई आणि गोराई खाडी परिसरात भाविकांची गर्दी होण्याची शक्यता असल्याने या ठिकाणी वाहतुकीचे नियोजन करण्यात आले आहे. त्यासाठी बॅकबे, वरळी, सांताक्रूझ, ओशिवरा, मालवणी, गोराई, दिंडोशी, विक्रोळी आणि मुलुंड येथील डेपो व्यवस्थापकांना विशेष सूचना देण्यात आल्या आहेत.

दरम्यान, छटपूजेच्या गाण्यांवरून सुरू झालेल्या वादाचे पडसाद कल्याण पूर्वेतही उमटले आहेत. भोजपुरी गाणी वाजवण्याच्या मुद्द्यावरून मनसेने मराठी भाषेचा आणि मराठी माणसाच्या सन्मानाचा मुद्दा पुढे आणला आहे. कल्याण पूर्वेत महाराष्ट्र नवनिर्माण विद्यार्थी सेनेकडून बॅनरबाजी करण्यात आली असून, त्यावर ‘महाराष्ट्रात पहिला मान मराठी भाषेला, मराठी माणसाला, बाकीचे नंतर!’ असा मजकूर झळकवण्यात आला आहे. गेल्या दोन दिवसांपासून रेल्वे स्थानकांवरील छटपूजेनिमित्त भोजपुरी गाणी वाजवण्यावरून राजकीय वातावरण तापले आहे. त्यातच मनसेच्या या बॅनरमुळे मराठी अस्मितेचा मुद्दा पुन्हा चर्चेत आला आहे.

एका बाजूला रेल्वे स्थानकांवरील ध्वनिक्षेपकांवरून सांस्कृतिक वाद निर्माण झाला असताना, दुसरीकडे छटपूजेसाठी येणाऱ्या भाविकांच्या प्रवासाची गैरसोय होऊ नये, यासाठी बेस्टने अतिरिक्त बसगाड्यांची व्यवस्था केली आहे. त्यामुळे आगामी दोन दिवसांत मुंबईतील चौपाट्या आणि छटपूजेच्या ठिकाणी होणारी गर्दी तसेच सार्वजनिक वाहतुकीचे नियोजन महत्त्वाचे ठरणार आहे.