शेवटच्या चेंडूवर पाकिस्तानला धोबीपछाड; टीम इंडियाचा जल्लोष!

india-beat-pakistan-asia-cup-2026शनिवारी ओमानमधील अल अमेरत क्रिकेट मैदानावर खेळल्या गेलेल्या १९ वर्षांखालील आशिया कप २०२६ च्या अंतिम सामन्यात पाकिस्तानला पराभव केला. शेवटच्या चेंडूवर एका विकेटने पराभूत केल्यानंतर भारतीय युवा ब्रिगेडचा जल्लोष पाहण्यासारखा होता. पराभवाच्या धक्क्यातून आधीच सावरत असलेल्या पाकिस्तानी संघाच्या दुःखात आणखी भर पडली, जेव्हा ट्रॉफी उचलल्यानंतर लगेचच भारतीय खेळाडूंनी मैदानाच्या मध्यभागी जे म्हटले ते ऐकल्यानंतर पाकिस्तानला मिर्च्या झोंबल्या असतील.

 

 

सामन्यानंतर झालेल्या पारितोषिक वितरण समारंभात भारतीय कर्णधार लक्ष्य रायचंदानीने चॅम्पियनशिप ट्रॉफी उचलताच, संपूर्ण स्टेडियम आनंदाने दुमदुमले. लक्ष्यने ट्रॉफी आपल्या सहकाऱ्यांकडे सुपूर्द केली, त्यानंतर संपूर्ण संघाने एकत्र येऊन ‘भारत माता की जय’चा जयघोष करत आपला ऐतिहासिक विजय साजरा केला. या जल्लोषाचा आणखी एक मजेशीर व्हिडिओ समोर आला आहे, ज्यामुळे पाकिस्तानच्या जखमेवर मीठ चोळले गेले आहे. या व्हिडिओमध्ये, भारताच्या विजयाचे नायक मोहित उल्वा आणि सी. व्यंकट, विजयाच्या जल्लोषात पाकिस्तानी खेळाडूंना चिडवताना दिसत आहेत. मात्र, परिस्थिती अधिक चिघळू नये म्हणून, टीम इंडियाच्या सपोर्ट स्टाफच्या सदस्यांनी तात्काळ घटनास्थळी पोहोचून त्या दोन तरुण खेळाडूंना शांत केले आणि त्यांना तेथून घेऊन गेले.

३३८ धावांच्या आव्हानात्मक लक्ष्याचा पाठलाग करताना, आर्यवीर सेहवाग आणि कर्णधार लक्ष्य रायचंदानी यांनी ९५ धावांची भागीदारी करून भारताला दमदार सुरुवात करून दिली. मात्र, मधल्या फळीतील फलंदाज झटपट बाद झाल्याने आणि आठ गडी गमावल्याने भारत अडचणीत सापडला. त्यानंतर मनाल चौहान आणि मोहित उल्वा यांनी नवव्या विकेटसाठी ५७ धावांची भागीदारी करून सामन्याचे चित्र पालटले. मनाल बाद झाल्यानंतर, मोहितने ११ व्या क्रमांकावरील फलंदाज सी. व्यंकट याच्या साथीने सूत्रे हाती घेतली आणि शेवटच्या चेंडूवर लॉन्ग-ऑफवरून चौकार मारून तीन धावांची पिछाडी भरून काढली.