ऑस्ट्रेलिया,
ben-ducketts इंग्लंडचा आक्रमक फलंदाज बेन डकेट याने ऑस्ट्रेलियाविरुद्धच्या एकदिवसीय मालिकेतील तिसऱ्या सामन्यात धावांचा पाऊस पाडला. त्याने शानदार शतक झळकावत ऑस्ट्रेलियन गोलंदाजांसमोर आव्हान उभे केले. अवघ्या ९४ चेंडूंमध्ये शतक पूर्ण करणाऱ्या डकेटने अखेर १३३ धावांची खेळी साकारली. हे त्याच्या एकदिवसीय कारकिर्दीतील सातवे शतक ठरले.
या सामन्यात इंग्लंडकडून टॉम बँटन आणि बेन डकेट यांनी डावाची सुरुवात केली. टॉम बँटनने ४४ धावा केल्यानंतर आपली विकेट गमावली. त्यानंतर जो रूटला अवघ्या १२ धावांवर माघारी परतावे लागले, तर कर्णधार हॅरी ब्रूकही १७ धावांपुढे मजल मारू शकला नाही. एकीकडे इंग्लंडचे फलंदाज बाद होत असताना डकेटने मात्र संयमी आणि आक्रमक फलंदाजीचा सुरेख मेळ साधत संघाचा डाव सावरला.
शतक पूर्ण केल्यानंतर डकेटने धावांचा वेग आणखी वाढवला. मोठे फटके खेळण्याच्या प्रयत्नात तो बाद झाला. त्याने ११५ चेंडूंचा सामना करत १५ चौकार आणि तीन षटकारांच्या मदतीने १३३ धावा केल्या. त्याच्या या खेळीमुळे इंग्लंडला मोठी धावसंख्या उभारण्यास मदत झाली. डकेटच्या नावावर आता सात एकदिवसीय शतकांची नोंद झाली आहे. विशेष म्हणजे, यापैकी तीन शतके त्याने मागील पाच एकदिवसीय सामन्यांमध्ये झळकावली आहेत. ऑस्ट्रेलियाविरुद्ध ऑस्ट्रेलियाच्या भूमीवर, तसेच इंग्लंड आणि पाकिस्तानविरुद्धही त्याने शतके नोंदवली आहेत. त्यामुळे त्याचा सध्याचा फॉर्म चर्चेचा विषय ठरला आहे.
दरम्यान, तीन सामन्यांच्या या मालिकेत दोन्ही संघांनी प्रत्येकी एक सामना जिंकला आहे. पहिल्या सामन्यात ऑस्ट्रेलियाने सात गडी राखून विजय मिळवला होता. त्यानंतर दुसऱ्या सामन्यात इंग्लंडने १३५ धावांनी मोठा विजय नोंदवत मालिकेत बरोबरी साधली. त्यामुळे तिसऱ्या सामन्यातील विजय दोन्ही संघांसाठी महत्त्वाचा ठरणार आहे. या एकदिवसीय मालिकेनंतर इंग्लंड आणि ऑस्ट्रेलिया यांच्यात पाच सामन्यांची टी-२० आंतरराष्ट्रीय मालिकाही खेळवली जाणार आहे.