मुंबई,
rohit-gets-emotional-over-dhonis-ipl-retirement भारतीय क्रिकेट संघाचा माजी कर्णधार महेंद्रसिंग धोनी याने आयपीएलमधून निवृत्ती जाहीर केल्यानंतर क्रिकेटविश्वातून त्याच्यावर शुभेच्छांचा वर्षाव होत आहे. भारतीय संघातील त्याचा सहकारी आणि मुंबई इंडियन्सचा माजी कर्णधार रोहित शर्मा यानेही सोशल मीडियावर खास पोस्ट करत धोनीच्या कारकिर्दीचा गौरव केला आहे.
आयपीएलच्या पहिल्या हंगामापासून या स्पर्धेचा भाग असलेल्या धोनीने १७ नोव्हेंबर रोजी आयपीएलमधूनही निवृत्त होण्याचा निर्णय जाहीर केला. आंतरराष्ट्रीय क्रिकेटला अलविदा केल्यानंतर तो सातत्याने आयपीएलमध्ये खेळत होता. मात्र, आता त्याने या स्पर्धेतील खेळाडू म्हणून आपला प्रवास थांबवण्याचा निर्णय घेतला आहे. आगामी हंगामापासून तो चेन्नई सुपर किंग्ससाठी मार्गदर्शकाची भूमिका बजावणार असल्याचे सांगण्यात आले आहे.
धोनीच्या निवृत्तीवर प्रतिक्रिया देताना रोहित शर्माने त्याच्यासोबतचा एक फोटो सोशल मीडियावर शेअर केला. त्यासोबत त्याने लिहिले की, "धोनी भाई, तुमच्या शानदार आयपीएल कारकिर्दीबद्दल अभिनंदन. इतकी वर्षे तुमच्यासोबत मैदानावर खेळण्याची आणि अनेक आठवणी जपण्याची संधी मिळाली, हा माझ्यासाठी खूप सुंदर अनुभव होता. तुमच्याबद्दल मनात नेहमीच आदर राहील."
रोहित शर्मा आणि महेंद्रसिंग धोनी हे दोघेही आयपीएलमधील यशस्वी कर्णधारांपैकी आहेत. मुंबई इंडियन्स आणि चेन्नई सुपर किंग्स यांच्यातील सामन्यांमध्ये या दोघांच्या नेतृत्वाची नेहमीच चर्चा होत असे. धोनीने २०२५ च्या आयपीएल हंगामात अखेरचा सामना खेळला होता. २०२६ च्या हंगामात तो सहभागी होणार होता, मात्र त्याला एकही सामना खेळण्याची संधी मिळाली नाही.
धोनीच्या नेतृत्वाखाली चेन्नई सुपर किंग्सने आयपीएलमध्ये पाच वेळा विजेतेपद पटकावले. २०१०, २०११, २०१८, २०२१ आणि २०२३ या वर्षांत चेन्नईने जेतेपदावर नाव कोरले. याशिवाय, धोनीच्या नेतृत्वात संघाने २०१० आणि २०१४ मध्ये चॅम्पियन्स लीग टी-२० स्पर्धेचे विजेतेपदही मिळवले. यशस्वी नेतृत्व, यष्टीरक्षण आणि फलंदाजीच्या जोरावर धोनीने आयपीएलमध्ये आपली वेगळी ओळख निर्माण केली आहे.